A la oriella el ríu Valdecarzana, baxo la
mole imponente de la peña Sobia, en plenu coral d’Asturies erguese dende
casique milenta años la ilesia de San Pedru, antañu monasteriu y güei colexata,
braeru brazu que xune’l prerrománicu ya’l románicu n’Asturies. Un edificiu
fermosu, galanu, revestíu de munchos ellementos de gran interés artísticu ya
hestóricu. Canecillos llabraos que entá amuesen una bona vayura de motivos
resistiendo el envís de los sieglos y les inclemencies meteorolóxiques, un
curiosu claustrín de maera y, ente otres ayalgues de gran valir artísticu ya
hestóricu, una de les notes más curioses no que sedría l’Asturies misteriosa;
les famoses momies de Teverga.
La Colexata de San Pedru, na Plaza de San Martin |
Munchu tiempu tuvi rondando por veles, pues
siempre me llamó la atención les lúgubres hestories que aportaben d’aquelles
famoses momies, les de unos antiguos nobles asturianos famosos pola so crueldá
ya’l abusu al que sometíen a los sos vasayos. Unos homes de forca y cuchiellu
que, con prerrogativa Rial, podíen impartir xusticia nel so feudu ensín tener
que rendíi cuentes a naide. Unos homes, marqueses de Valdecarzana, familia del
más ranciu abolengu na nobleza asturiana famosos por exercer ensin midía el
drechu a pernada que les antigües lleis yos permitíen.
Dientro la colexata, nun cuartín al fondu’l
claustru, nel nomáu muséu (aunque talmente paez un trasteru), xunto a dalgunes
pieces antigües comu’l mantu bordáu en oru de Doña Urraca de Ron, esposa del
primer Marqués de Villacarzana y un armariu d’Ikea, amuesense les urnes que
caltienen los cadáveres momificaos del segundu Marqués de Valdecarzana D. Lope
Fernández de Miranda Ponce de León y Pardo y del so fíu (o’l so sobrín según
sofiten otros) D. Pedro Felipe Analso de Miranda y Ponce de León.
Claustrín de maera. Al fondu a mandrecha el accesu al muséu de la colexata |
Na urna inferior, vistíu con un cenciellu
traxe de llinu blancu, reposa’l marqués malditu nel recuerdu los teverganos.
Poseedor d’ún importante señoríu que, con centru en Teverga foi espardiéndose
por tolos conceyos cercanos, llegando a algamar tierres de Grau, Pravia o Avilés
ente otros. Cruel comu bien yos prestaba ser a munchos d’aquellos homes de
forca y cuchiellu, el marqués tevo muncho enclín por facer de so a les moces
del llugar, faciendo ampliu usu del drechu de pernada sobre les sos vasalles.
Cunten les lliendes que entá se esparden al calor d’una cocina carbón nes fríes
nueches inverniegues que’l marqués nun se llimitaba a facer usu d’esti drechu
con les moces enantes de casase, sinón que facíalo siempre que se-i antoxase y
con quien-i peteciera. La protesta, más allá de la rabia contenía, nun yera
posible. Amu y señor el mesmu yera xuez y verdugu. Munchos bastardos dexó
espardíos polos valles teverganos. Y como el placer que a esa xente-i producía
la humillación del sometíu nunca nun tinía llímite, a les muyeres que tiníen la
desgracia de quedar preñaes, al acudir a los servicios relixosos que tiníen
llugar na Colexata prohibía-yos entrar pola puerte principal, teniendo que
facelo por una sita nun llateral y que dende entós tomo’l nome de puerte l’humilladeru.
El segundu marqués de Valdecarzana Lope Fernández de Miranda |
Na urna cimera, ataviá coles ropes acordies a
la so dignidá eclesial, D. Pedro Felipe Analso de Miranda y Ponce de León,
durante munchos años abad de la colexata de San Pedru de Teverga, ente 1720 y
1729 obiespu de Teruel, confesor particular del Rei Felipe V. Nun se sabe si
esti home tamién fizo suyes les atrocidaes que cometiere so Pa, pero el so
recuerdo tampocu ye bonu na memoria colectiva del valle Teverga. El respetu non
foi quien a ganalu nin dempués de muertu. Talo foi que, a la momia, pesia a
caltener un bon estáu de conservación, faltai la manzorga. Paez ser que n’ella
tendría dalgún aniellu de valor representando la so dignidá eclesiástica. El
aniellu non debió salir fácil que’l lladrón tevo que llevase la manu entera.
El fíu del marqués, Pedro Felipe Analso de Miranda |
Pué sorprender al visitante detalles comu la
llimpieza nes ropes, y ye que durante munchos años los cures de la parroquia
desvestíen regularmente a los señores de Miranda pa llimpia-yos les ropes. La
curtia estatura del marqués o les uñes llimpies y cudiaes.
El atavíu de obiespu. |
Tradicionalmente, cuntábase que’l marqués
morriera axusticiáu en pagu a los sos crímenes cometíos n’una vida d’abusu y
poder. Que lu habíen pasáu a cuchiellu, y que nel so garguelu tinía la marca. El
tayu nel garguelu esiste, pero’l marqués non foi asesinau. Non foi cruel la
vida con elli. El marqués vivió sos caberos años recluyíu nel monasteriu los
Xerónimos en Madrid. Tres la so muerte foi treslladáu a Teverga pa ser enterráu
na Colexata. El orixe del tayáu que amuesa nel so garguelu nun ye conocíu.
Ropes cencielles y tayu nel gargüelu nel reposu del marqués |
Tres sieglos dempués de que aquellos homes
vivieren en tierres asturianes, un curiosu procesu de momificación natural al
ser enterraos en unes condiciones de calor y humedá determinaes legónos un
pequeñu tesoru, una ayalga cultural, misteriosa y morbosa que, a modu de castigu
polos sos desmanes en vida, terminó por convertilos en una simple atraición pa
turistes y curiosos. Y yo perencantáu de tenela.
Más misterios de San Pedru de Teverga, la puerte de los misteriosos grabaos, simboloxía gremial, secretu de canteros. |