La necrópolis neolítica de la Campa l'Españal

     La primera vegada que subí a la campa L’Españal a la gueta del dolmen de La Mesa los Moros sedría fai 20/25 años. Por entós el dolmen yera perconocíu pola xente de la redolada y amás taben catalogaos un castru y dalgún túmulu pola mesma zona. De toos modos aquello yera como son munchos de los montes comunales de los cordales de la cuenca’l Nalón: un bardial tremáo de sebes, matos y felechos ente los cuales apaecen dacuando algún práu zarráu con alambre pal ganao. Fui quien a atopar el dolmen pesie a saber na más que taba nun crestón rocosu que miraba pa Blimea. El castru pude albidralu somorguiáu ente tanta maleza. Túmulos nun fui quien a topar ningún.

La mesa los moros allá nos entamos de los 2000, muncho más limpio de maleza que anguaño 

     Al pasu los años durante unos trabayos pa reforestar la zona, atopóse otru túmulu hasta entós desconocíu, y tuvieren bien da-i una dotación económica a la excavación, estudiu y tresformación en un elementu visitable pola xente en xeneral, aprovechando les circunstancies pa indicar el llugar que ocupa’l castru y el dolmen, el elementu más famosu del conxuntu. A diferencia d’otros túmulos fácilmente visitables en necrópolis como la del Monte Areo ente Xixón y Carreño y el Monte Deva, en xixón, equí podemos ver lo que se escondía baxo la tierra, lo que normalmente nunca podemos ver.

     Todos los elementos citaos se alcuentren a lo llargo del cordal que va dende’l pueblu de La Casilla, na carretera que xune los conceyos de Bimenes y Samartín del Rei Aurelio a traviés del altu de La Faya los Llobos. Desde La Casilla, hacia el oeste sal una pista de tierra que nos lleva direutos a la Campa L’Españal. Malpenes ye un kilómetru y medio lo que nos separa de los yacimientos, nun camín de muy poca pendiente que bordea campes y picos hasta La Campeta.

     El primer elementu que atopamos ye’l túmulu descubiertu en 2016 na campa L’Españal, a mandrecha, xunto a un cartelu que también identifica la ubicación d’otros restos. El túmulu excaváu tiene una antiguedá de ente 6000 y 5000 años. Les prebes del C14  dataron parte de la estructura nel milenio IV a.d.C, mientres que paez ser que nel III mileniu enantes de Cristo llevantaríase nel mesmu una de les cámares funeraries, lo que da un periodo d’emplegu d’esta estructura funeraria de al menos un milenio. 

El túmulu del Españal. Tres de la excavación albidrase la estructura tumular ya les cámares funeraries del interior 

    Tien unos 10 metros de diámetrou por un d’altor, y foi excaváu completamente en dos campañes diferentes en 2017 y 2018 . De los restos atopaos lo que más destaca son dos cámares funeraries. Hai que señalar pal non avezáu que non tolos túmulos tienen nel so interior un dolmen. Hai delles tipoloxíes. Si bien los dólmenes tradicionales son los elementos más llamativos pal común, munchos lo que caltienen son cámares dolméniques feches con pequeñes llábanes de piedra, nada monumentales. Incluso hailes que direutamente nun tienen estructura pétrea ninguna.

Les dos cámares funeraries. A manzorga la que data del mileniu VI adC y nel centru la más moderna, del mileniu V adC

     Durantre les excavaciones atopáronse dellos utensilios relacionaos coles polaciones que llevantaron el túmulo, destacando dos machacadores fechos con regodones cuarcíticos de ríu, piedres que nun son a atopase nel llugar onde se llevanta la tumba neolítica. 

     A pocos metros d’esti atópase otru túmulu según indica un panel, el túmulu de La Segá. El estáu del tarrén ta totalmente arrasao y la estructura ye casique inapreciable al güeyu del profanu.

El túmulu de la Segá. Muy esborriáu pol tiempu, cuesta atopalu.

     Siguiendo’l camín que va de La Casilla a La Campeta en dirección oeste, llegamos al picu Al Peón. Debaxo de toda la maleza que ocupa el piquín se escuende’l castru del Españal, también citáu como los Cuetos. Descubiertu en 1973 por José Ramón López Blanco, folclorista amateur de Blimea dempués de que un incendiu arrasara la vexetación y dexara a la vista lo que paecíen tres fosos al rodiu de ún pequeñu recintu de 40 por 10 metros. Tamién albidrábense restos de muries alrededor. Nos últimos años dalgunos estudios d’arqueólogos ponen en dulda el calter castreñu del conxuntu. A falta d’una investigación arqueolóxica seria, la braera naturaleza del llugar está por definir.

     Al sur del castru, mirando pa’l Nalón y pa Blimea, desciende un crestón rocosu nel que se llevanta la Mesa los Moros, el nome tradicional de lo que arqueolóxicamente se conoz como el dolmen del Españal. Ellí nos atopamos con una serie de llábanes cincáes na tierra que xunto col mesmu crestón formen una cámara sobre la que s’afita una cobertoria de gran tamañu y que caltién dellos petroglifos, dalgunos claramente venceyaos al neolíticu ya’l megalitismu, como son cazoletes y círculos piqueteaos, y otros con orixe más complicao d’establecer, y que a mi parecer, son muncho más modernos.

     A un lláu del dolmen hai una pequeña piedra con talla ovalada. Ye una de les esteles de los Cuetos. Nel inventariu arqueolóxicu dase cuenta de tres más una de factura muy tosca que ye duldosa. Básicamente son piedres a les que se yos dio una forma más o menos circular, sin ninguna otra decoración. Reciben el nome de esteles pola semeyanza coles esteles funeraries de tiempos postreros magar que en realidá nun se yos puede asegurar que tuvieren esa finalidá.

Nel centro de la imaxe una de les esteles de los Cuetos, parcialmente cubierta por tierra y vexetación

Dalgunos elementos que atopamos nel dolmen. Arriba manzorga, petroglifu de datación y significáu inciertu. Arriba mandrecha, circulo piqueteáu. Abaxo manzorga, cazoleta. Abaxo mandrecha, otru petroglifu de significáu inciertu y que se repite por tola cuenca del Nalón, probablemente d'orixe modernu.

     Existen dalgunos túmulos más pola zona,  magar que yo nun los tenga localizaos. Pero la mesma naturaleza topográfica del cordal lo fai más afaízo tantu pa esti usu, como pa estructures defensives de la edá del fierru o medievales. De xuru que nos próximos años dirán atopándose más coses como apaeció esi túmulu en 2016.

     Un paséu curtiu ya ensín dexixir mayores esfuercios que nos dexa ver la que güei pue ser la estación arqueolóxica del neolíticu más visitable pal aficionáu n’esta parte de la cuenca’l Nalón.