Nel reinu la xaronca: los llagos de Salave

     Espardíes les cases a lo llargu la rasa tapiega. Abiertes les ventanes de par en par acoyendo’l sol que tantu se fizo rogar. Un aire seliquín ximielga galbanosu dalgunos trapos blancos. N’ellos, escritos col trazu arrechu de la decisión, en prietu collor, pué lleese: ORO NO.

     Tamos en Salave, enguedeyu d’intereses asturcanadienses. Unos suañen coles miles de tonelaes d’oru que impregna la tierra (el mayor yacimientu d’oru conocíu na Europa occidental). Otros, con despertase a la mañana y tornar a ver los mesmos campos que vense güei, esnalar bien fondu el golor del ocle que vien de la mar cercana, ensin el miéu a que una balsa enllena cianuru y mercuriu esparda el so velenu almacenáu emponzoñando agües,  tierres y xentes. Tamos n’el coral d’un llucha ente’l dineru y la vida, entendiendo por vida el pasáu, el presente y, comu non, el futuru.

Restos de galeríes mineres

     La atraición atávica que’l doráu metal fexo sobro’l home dexó la so güelga n’estes tierres. De xuru explotaos poles tribus astures, los romanos enfotáronse con gran tesón en sacar toles riqueces que atesoriaben.  Furaron mines, movimieren de tierres con agua, restolaren ente los sedimentos,  dando-i forma colos años a un llugar curiosu, una especie de fosa o valle  nel que, abandonaes les llabores estractives al agotase los yacimientos primarios d’oru, xurdieron llamuergues y prendió bayurosa vexetación.  D’aquelles ruines ñacieron les llagunes de Salave, o de Silva, un paisax xurásicu entá vivu n’Asturies del sieglu XXI.

 

Dende fuera una masa arborea que nun anuncia lo que escuende

     Adéntrase nes llagunes de Salave supón un viaxe nel tiempu, retrociendo más y más atrás con cada pasu que se da. Cuesta-i a los rayos del sol atravesar la bayura de rames y fueyes, posándose sobre les verdes agües tremaes d’algues y plantes acuátiques. Camuda’l soníu. Ya nun se oye el ruíu de los coches que pasen pola nacional. Nun se oye el cencerru de les vaques o’l xolgoriu de los neños ensín colexu. Una tronera invade’l llugar. El canciar de milenta xaronques al compás redoblando nes parées del llugar, amplificando el so soníu. 

     Munches son les especies de xaronques que moren n’estes agües muertes. La xaronca verde, la patillarga o la bermeya, el sapu parteru o el pintoxu. Les inconfundibles sacaveres. Les gafures palmeades, iberiques y xaspiaes. La salamandra rabillarga, endemismu que namás se atopa nel noroeste penínsular. Toa una triba d’anfibios que fain d’esti llugar un suañu pal herpetólogu. Pero además, pueblen estes agues les llondres, esos mustélidos marcadores de la pureza del agua y de la bona calidá medioambiental.

     Tamién destaca la bayura vexetal. Pinos, carbayos, dalgún ocalitu na parte esterna. Dempués, aportando al humedal, la milfueyes d’agua, cuya presencia n’Asturies llimítase a esti enclave. Felechos de pantano. Humeros enraigoñaos ente les agües. Escayos o silves que-i dan el nome al llugar. Y munchu más.

     Güei, la so pervivencia pende d’un filu. Recursos xudiciales, sentencies, pleitos, sobornos. Muncho ye lo que entá falta por decidir. Una llucha ente la codicia y la tierra. Ente los valores que nos traxeron a la actual situación económica y aquellos nos xurden de la tradición rural, de la querencia pol raigañu. Pol llugar que a ún i vio ñacer. Una pelea ente homes que amenaza una tesoru asturianu, ún de esos comu los que vemos nos reportaxes de la National Geographic, pero que nun ta en Africa, nin nel Amazones, sinon equí, cerquina de Tapia, en tierres de Salave.