Guetar n'esti blogue

lunes, 27 de agosto de 2012

Nun soi entendelo


     Nun soi entendelo. Nun soi quien a imaxinar que un home puea face-i eso a los sos fíos. Refierome claro está a la noticia que, aunque esperáa garronos a toos pol llombu pa dexanos ablucaos, desconcertaos. Falo, claro está, del asesinatu vil y cobarde de los neños de Córdoba, Ruth y José.

Los neños de Córdoba, cares d'un crimen que nunca tuviere que asoceder

      Paso dos tercios del añu atrulláu ente cuatru mamparos, rodiáu d’agua, a milenta milles naútiques de la mio casa, de la mio familia. Toles nueches, al llevantame, a eso de les 3:40 la mañana pa entrar de guardia, echo los gueyos al mamparu d’estribor. Ehí, al altor los mios güeyos danme los bonos díis dos neños sorientes, xugando ente ellos ayenos al oxetivu de la cámara. Son Llara y Llorián, de 5 y 3 años. Son los mis fíos.

Llarina, que hai 5 años-i diste un nueu sentíu a la mio vida

     De edá asemeyá a los neños cordobeses fáiseme cortocircuitu na mente al intentar dai desplicación a esi actu sabaz. Nun me val la venganza, nun me val l’odiu a una muyer que ya nun quier tar xuntu a ti. Nun me val la enayenación mental, llocura. Nun me val ná. Nun soi entendelo. Naide nunca sedrá a fecemelo entender. ¿Como un Pa pué quitayos la vida coles sos manes a eses criatures, prendeyos fueu y velos desfacese ente les llames? ¿Cómo pué daquién vivir con eso y nun alloriar, nun confesar? Nun soi entendelo. Nin quiero que me lo despliquen. Psicólogos, psiquiatres, nun lo intentar. Nun quiero perder la Fé nel home, que en Dios va cuantayá la perdí.

     Desgraciadamente nun va haber xusticia. Y nun lo digo porque nun esista cadena perpetua, nin pena muerte, nin porque a esti desgraciáu nun-i vaigan facer lo mesmo que-i fizo a los guajes. Eso nun ye xusticia. Xusticia sedría que dos neños de 6 y 2 años tuvieren vivos, esfrutando la so mocedá, descubriendu’l mundiu, lo bono y lo nun tantu, col ciñu sos Pas, aunque ya nun tuvieren xuntos. Eso sedría la xusticia. Lo demás ye venganza. Xaciar la nuesa rabia con un desfoguín xabaz. Nun ye lo que quiero yo, aunque sélo per bién que poca xente pensará asina. Los xueces, abogaos, lleis fairán lo que tean bien a facer. Salga lo que salga nunca nun habrá xusticia, porque los neños ya nunca más tornarán a durmise acucaos nel sen so Má. Pase lo que-i pase, d’esti crimen sedrá’l meyor paráu.

     Miro de nueves la semeya que cuelga del mamparu. Les dos cares sorientes, manes enredando, ún al llau del otru. Lo más grande, lo meyor que fice en mi vida y torna otra vegáa más la mesma idea a la mente y non, nun soi quien a entendelo.

Llorián, que bien sabes tú ganate a la xente