Guetar n'esti blogue

viernes, 14 de septiembre de 2012

La necrópolis tumular del Monte Deva


     Dende hai un tiempu tinía yo pendiente una collaboración con Berto Arias, collaciu d’Asturtsalia y editor del blogue lafuentedeva.blogspot.com, nel que trata de tóu aquello que tién que ver cola nomá parroquia xixonesa, de la que, nel so dicir, “tien munchu que cuntar”.

     Comu seya que yo tamién tengo pasaes munches xornaes por aquellos llugares, pasao munchos bonos momentos d’espardimientu pol mesmu parque, pol observatoriu astronómicu, polos chigres del pueblu, d’investigación tres lo túmulos o les gafures, de franca folixa ente parrilles y sidre o d’esfrute de la ñatura caleyando sele polos montes y caminos, ofrecime un díi a facer daqué en comuña al rodiu la necrópolis tumular del monte Deva.  Y d’aquelles intenciones estes realidaes. Güei, tantu n’Asturtsalia comu en La Fuente Deva espublizaremos un post sobre esti yacimientu arqueolóxicu, ca ún dandoi el so xeitu al testu, pero compartiendo fontes, semeyes y lo que faiga falta. 

      Seya esta la primer collaboración con ún blogue collaciu más non la cabera.

     Por configuración xeográfica, el conceyu Xixón asemeya una amplia depresión semicircular, nel que’l tarren desciende selemente en direición a la mar, guardáu por una serie de cordales que lu arrodien. Partiendo dende la mar, a poniente, la Campa Torres, siguío pol monte Areo, el cordal de Santufirme, el picu San Martín, la senra’l Fariu, los montes de Baldornón y los de Deva, a llevante, ya al entamu la rasa mariñana. Lo bayuroso de les tierres fértiles asina como la esistencia del puertu y abrigu ñatural de la bahía San Llorienzu fixeron d’esti enclave llugar d’asentamientu humanu dende antigüu. D’esta presencia humana dan bona fé la presencia de yacimientos tumulares a lo llargu d’estes cordaleres, ente les que destaquen les del Monte Areo, con una treintena d’estructures tumulares y dolméniques, la de la cabaña’l Marqués, en Caldones y la del Monte Deva.

Dolmen de los Llanos nel Monte Areo

     La del Monte Deva consta angüañu de nueve túmulos alliniaos a lo llargu’l monte, dende l’Arquera al propiamente dichu monte Deva, pasando pol monte La Olla. Además, y comu ellementu de gran interés, dientro la necrópolis atópase un afloramientu rocosu nel que entá son perceptibles los trabayos d’estración de piedra, y que ye la cantera de la que se sacaren los bloques areniscos colos que se llevantaron les tumbes.

     De los nueve túmulos catalogaos dos d’ellos (denominaos túmulos III y V) foron escavaos polos arqueólogos Miguel Angel de Blas Cortina y Otilia Requejo nuna serie de campañes dende’l añu 1998 al 2002 col enfotu d’estudiar y poner en valor cultural esti yacimientu enclaváu nel Parque Ñatural del Monte Deva.

La cantera

     Comu ye vezu común n’esti tipu yacimientos, toos presentaben grandes pozos d’espoliu por parte de ayalgueros que dende antigüu escarbaben a la gueta les mítiques ayalgues que los moros, na so precipitá fuxía de tierres astures tres de la derrota sofría en Cuadonga, enterraren por nun poder llevales con ellos de tan grandes y fabuloses que yeren. Les ayalgues nun sé si les atoparen, pero desgraciadamente los destrozos arrasaron con unes construciones que cunten con miles de años d’antigüedá, una ventana cierta al nuesu pasáu.

     Del estudiu ya escavación de los túmulos sacose a la lluz la bayura tipolóxica de los enterramientos asina comu la so distribución nel tiempu. El túmulu III, el más averáu a la cantera, presentaba una estructura de tipu dolménicu nel so interior. La peculiaridá d’esta ye que construyose mediante la escavación del nichu na mesma roca madre, pa dir dempués rodiándolu con llabanes arenisques de bon tamañu, conformando asina’l dolmen. Al rodiu del dolmen llevantáronse dellos círculos concéntricos de piedres y, tapeciéndolo too una coraza piedres y la cobertoria de tierra final. Ente los afayos sacaos a la lluz na escavación destacaben enforma varies puntes de fleches de piedra trabayaes con ciñu.

El túmulu III
 
     Apenas 25 metros monte arriba alcuéntrase el túmulu V, un montículu d’un metru d’altor y 21 de diámetru. Pesie alcontrase tan cerquina del otru y, polo tantu, tamién cerca de la cantera, al facese la escavación anicial alcontraronse conque nun esistía estructura dolménica central, namás piedres sueltes y tierra. En posteriores campañes, al abrise nueves cates alcontrose una estructura en forma de sarcófagu formada por pequeñes llábanes d’arenisca que probablemente sirviera en so díi de llugar d’acoyimientu del difuntu. La ausencia de megalitu y la sustitución d’esti por pequeños sarcófagos de piedres pequeñes implicaría quel túmulu V sedría mui posterior al III lo que significa que la necrópolis foi llugar d’inhumación y cultu durante munchos centenares d’años.

     Otra curiosidá ta en que, a diferencia de lo que ye habitual, esta estructura nun ocupaba la parte central del túmulu, sinón que taba desplazá a un llau polo que nun se viera afeutada poles incursiones de los ayalgueros. Desgraciadamente nun apaecieren restos humanos nos enterramientos, algo que ye normal en tarrenos ácedos como los asturianos, nos que’l material orgánicu termina por desintegráse totalmente.

Túmulu VI
 
     Na parte más alta del Monte Deva puen distinguise ente la maleza los restos d’otros dos túmulos, muy afeutaos polos saqueos y que de xuru caltuvieren nel so sen estructures dolméniques a la vista los bloques pétreos espardíos en tornu los pozos de saqueo. Curiosamente, la presencia de dambos yacimientos obligó nel so díi a llevantar el observatoriu astronómicu nun estremu del cumal y a menor nivel, embede de na parte cimera comu sedría lóxicu d’imaxinar.

     La sacralidá d’esta zona llevó nel so momentu a que la Sociedad Astronómica Asturiana Omega presentare comu ellementu complementariu al observatoriu, un proyeutu pa llevantar un observatoriu megalíticu, un Stonehenge xixonés nel que, mediante’l emplegu de bloques pétreos, recriar esti tipu d’estructures arcaiques. Lo de observatoriu megalíticu vendría pola conocía relaición que munches d’estes estructures tienen colos astros, y asina llevantaríanse enfilaciones colos puntos de salía y puesta del Sol en solsticios y equinoccios, enfilaciones cola Polar y los puntos cardinales, etc. Desgraciadamente, y pesie a tar presupuestá la so construción delles vegaes nunca llega a tomar forma rial ellementu tan particular.

Túmulu VIII

      A falta d’ellementos orgánicos que permitan la datación de los yacimientos pol carbono 14, esta tien que facese por comparanza con otros similares. Asina, la necrópolis tumular vendría siendo emplega pol home dende’l mileniu III a.C. hasta los primeros tiempos de la Edá del Bronce, pola diferencia nes teúniques constructives que ya se citaren.

     Su función vendría a ser la mesma que se-i supón a esti tipu de construciones. Tendría un calter relixosu, comu llugar d’enterramientu de individuos d’una sociedá neolítica, asociá quiciaes a un llugar xeográficu de cultu divinu. Y nun ye d’estrañar cuando el mesmu nome del monte fai referencia a una deidá indoeuropea perespardía por tou el continente, o comu, la que se asitia al otru llau de Xixón, la del monte Areo, lo fai nun llugar con nome tamién de evidentes reminiscencies relixoses, quiciaes evocando la semeyanza ente los dólmenes y les ares o altares nos que se fain les ufiertes a los dioses. Por otru llau, tamién habría que dai a la necrópois un sentíu de territorialidá, pues alcuéntrase nun llugar nel que, ensin los ocalitales que güei lu pueblan, sedría perceptible dende les tierres más baxes au taríen los asentamientos de los antiguos pobladores.

     Pa finar, destacar que ún de los mayores alicientes que tien esti yacimientu ye la so accesibilidá y la so visualidá, pues alcuéntrense a lo llargu’l camín que crucia el parque, además de tar, dalgunos, señalizaos con paneles, lo que permite observalos ensin tener que lluchar escontra la maleza o los ocalitales que tantos yacimientos asturianos caltienen tapecíos al güeyu humanu. Un llugar, antañu de cultu y güei d’ociu, nel que la diosa Deva entá sigue velando pol vivir de la xente que, a sos pies, vieno a llevantar lo que güei ye’l conceyu de Xixón.


domingo, 2 de septiembre de 2012

L'Aramu, onde'l calizu reina

     Sierpea la carretera pol valle Quirós. Atrás voi dexando pueblos y concejos. Biesques, praos y banzaos. A manzorga, les estribaciones de la senra l’Aramu, el indubiable protagonista nel paisax de l’Asturies central. Dexó tres de mi Bárzana, la capital quirosana. Ante mi Santa Marina, onde años va pasare per bonos ratinos tomando cañes na desapaecía Tabierna Folk. Ufiertenseme tres opciones, L.lindes, Ricáu o L.lena. Esta ye tres la que voi. Desvíome a manzorga camín de L.lanuces, ún d’esos pueblos tan guapos que s’esparden per estos montes y estos valles. Pueblos de cases solariegues, cases de piedra y maera, bien conservaes, calteniendo la armonía col entornu y faciendo d’ellos pequeñes puertes d’acesu al pasáu agrariu del valle’l ríu Trubia.

     Sigo conduciendo col destín bien marcáu na mente. Alló, a mandrecha albidrase no cimeru un monte les ruines de la Capiella San Xuan, llevantá en dómina medieval sobre les ruines d’un castru. Más pa’l fondu, les pindies laderes de Peña Rueda. Tres d’ella esa ayalguina de la ñatura astur que son los puertos de Güeria, un enclave paradisiacu a los pies del Güertu’l Diablu. ¡Que desgracia del asturianu que teniéndolo tan cerquina nun lo conoza!

     Al llegar al alto la Cobertoria veo la pista hormigón que conduz a L.lagüezos, el famosu práu de la fiesta’l corderu.

     Dexo el coche aparcáu a la vera la pista. Dende equí ye más prestoso dir caminando.

     Dicin que’l mesmu nome de Aramu sedría d’orixe prerromanu y que bien pudiere tener un calter relixosu, y tar referíu a dalguna deidá astur. Yo nun lo sé, pero bien ye ciertu que esos montes tuvieren gran importancia na hestoria d'esta tierra, tanto no económicu comu en cuestiones de calter relixosu. Asina dende los yacimientos mineros de cobre de L.lamo a los complexos megalíticos espardíos a lo llargo la senra y nos cordales secundarios. Yo nun creo en maxa, pero si toi convencíu que hai llugares nos que ún pue fundise cola tierra, colos árboles, ún sitiu d'esos que fai sentite que formes parte d'elli ya elli forma parte de ti. L'Aramu, colos sos cordales de calizu frayáu, paisaxes kársticos desnudos, ye ún d'ellos.

Un de los dólmenes de la Mata'l Casare
      Los pies conocen el camín abondu andáu. Delles vegaes lu fixeren ya. La pista termina por perder el formigón pa pasar a la tierra y el grijo. Crestones pétreos francen la probe tierra de escasa vexetación. Malpenes hai árboles na parte cimera. Casique tou lo que se ve ye matu: gromos, escobes, argomas, brezos, piornos y gorbizos. Sicasi dalgún xardón, y alló, nun llugarín más baxu mirando pa'l valle L.lena, una mata ocalitos que nun debiera tar ehí. Xunto a esos ocalitos, tapecíos polos altos felechos del branu, los dólmenes de la Mata'l Casare, dos de los pocos dólmenes astures que conserven la cobertera en so llugar.

     L.laguezos, tremao de dólmenes y túmulos, les cicatrices de les cates de los arqueólogos entá visibles onde los matos nun les tapecieren. Llábanes de piedra asomen ente la vexetación indiferentes al güeyu profanu. Ortostatos de cámares dolméniques que yos dicin al caminante el valir que estos cumales tuvieren nel sentir relixosu del astur neolíticu.  

Panorámica dende la collá los fitos
      Nel colláu los Fitos, col so cromlech de xuguete, el camín torna a baxar. Dende ehí, los valles de Quirós, de Riosa, L.lena, la peña Sobia, milenta montes y montañes, cordales que taracen esta tierra comu les engurries el rostru l’ancianu. Cordales calizos de valles estrechos, llagos, mayaos y foces. Testigos del pasu de los homes que dende antigüu pasaren por esti país, dexando la so robra en forma pintures, dólmenes, ilesies, castros y castiellos, corros y brañes.

     Siguiendo'l camín aporto a la altura'l colláu Cimeru cola cerreterina de montaña que, dende la vertiente l.leniza de la Cobertoria conduz a la cume´l Gamoniteiru.

     Pol momentu tengo que siguir pola carretera, a la solombra Peñapodre, pero deseguida tomo un desvíu, a mandrecha, una caleya mal trazá, fecha pol ganáu que pastia equí, que baxa hasta´l fondu la veiga los Veneiros, un vallín ciegu, nun se si d'orixe glaciar comu'l que ocupa la cima'l Monsacru o una depresión kárstica de gran tamañu. Lo braeramente importante ye'l llugar en si mesmu. Un vallín de yerba verde vivu, densa pero de pocu altor, con forma d'arcu, rodiáu por pindios cumales de calizu peláu, y na que na parte más fondera alcuéntrase la llaguna Veneiros y delles cabañes pal ganáu, dalgunes entá de muries recies y teyau firme, otres, abatíes pol pasar de los años, les inclemencies meteorolóxiques ya'l escaezu del home que refugó del ganáu pa trabayar nes mines que arrincaben a esta tierra carbón, cobre y fierru. La veiga los Veneiros, fermosura tricolor: verdes los pastiales, grises los cumales circundantes ya'l azul del cielu de branu.

Llagu na veiga los Veneiros
      Pasáu el llagu au se refresca del sol del branu dalgunos caballos sueltos, dexaes detrás les cabañes de piedra, tornase pindia la campera pa llegar a un collaín a mediu camín ente Peñapodre y el Gamoniteiru. De nueves tamos al pié la carretera. En frente, un nueu vallín, otra campera de verde yerba rodiá de peñascales calizos, nel que destaquen los cierros pal ganáu y un par de cabañes. Tamos na braña la Bargaña. 

Cierru pal ganáu na Bargaña
      Siguiendo ya pela carretera, coles antenes de radiotelevisión al fondu, aportamos al Gamoniteiru, el coral del Aramu, el picu más altu la senra con 1791 metros. La panorámica, brutal. La cuenca’l caudal, los montes somedanos, Uviéu y al fondu, ente la borrina, Xixón ya’l mar. Al llau, el picu Xistras, otru colosu de la senra, con 1765 metros. Ente ellos otru más de los llugarinos máxicos del Aramu, el l.lagu la cueva. Deseguío el Angliru, famosu nel mundiu enteru, la Gamonal y munchos otros de menor porte pero d’igual prestancia.

Al fondu, la carreterina que dende La Cobertoria sube al Gamoniteiru al pie de Peñapodre
      Sentáu enriba una peña, tranquilu al calor de la tarde, con un país tendíu a los pies. Paez durmíu de tan tranquilu. Esnalo, esnalo fondu, enanchando los polmones col aire fresquino que sopla no altu, ciarrándo los güeyos y dexándome llevar pol sele soníu de les montañes: el cimblar de los cencerros de dalguna vaca nuna campera no llonxano, un ferre o una zapiquera nos cielos, el xiblar del aire ente les antenes. Abro los güeyos y miro. Embaxo, en direición pal valle’l Güerna, sube una columna de fumu prietu. Oíse un volaor. Y entós daste cuenta que non, que esi país nun ta durmíu, y alló baxo, polos valles de les cuenques, les llaneres del centru y les rases de les mariñes el sangre se mueve, llate’l corazón, y los asturianos siguen somorguiaos na so llucha diaria por vivir, por que nun nos quiten lo que ye de nos, por nun tener que tornar a baxar la cabeza, siervos ante señores.

     Y güei comu ayeri, l’Aramu sedrá testigu d’esta hestoria.

La veiga los Veneiros col llagu