Guetar n'esti blogue

lunes, 23 de enero de 2012

Llumeres: l'encantu d'un llugar abandonáu

     Siguiendo la carretera que dende Lluanco va camín de Peñes, al pocu de dexar atrás Bañugues, ábrese una ensená de cantiles pindios, xuru refuxu a vientos y marexaes del noroeste, que destaca enforma por ruines espardíes, pedreros que s'adientren na mar asemeyando les grades d'un astilleru y agues roxes que mueyen un sablón del mesmu collor. La ensená de Llumeres, col so puertu arruináu soportando'l batir de galernes y foles, acucáu na so soledá, ensín naide que percorra los cais, ye ún d'esos requexinos máxicos que, afortunadamente, tantu abondien n'esta tierra de nueso.

Parte oriental de la ensená de Llumeres, col puertu al fondu y delles ruines de la mina a mandrecha

     Llumeres, un puertu ñatural ensín pueblu, un de los dos únicos refuxos naturales, xunto con Xixón, escontra los temporales del noroeste, los más violentos que solmenen esti mar Cantábricu tevo vida curtia y tardía.

     Dende tiempos prehistóricos conozense dellos yacimientos mineros averaos al fierru n'Asturies. Dende la Sierra l'Aramu al oriente Astur puen atopase yacimientos mineros esplotaos nes dómines castreñes ya romanes. De toos estos yacimientos, munchos de los cuales entá furrularon hasta metanes del sieglu pasáu (Los Llamargones de Quirós, el Narancu d'Uviéu, Sobrescobiu,...) Llumeres foi la de mayor importancia y que mayores cotes de produción algamó. Ye creyencia que esti yacimientu yera'l que suministraba la materia prima pa los poladores del castru la Campa Torres, los cilúrnigos, pueblu de xente fino nel trabayu'l metal, especialistes nes fundiciones ya ellaboraciones de utiles de fierru (mesmamente la torna'l so nome sedría "caldereros").

Mina de Llumeres nos años 50. Semeya del archivu de Duro-Felguera

     Col trescurrir de los tiempos ya'l aniciu la industrialización, la rellativa abondancia de yacimientos férricos n'Asturies axuntaos a los del carbón, fixeron d'esti país centru neuralxicu del esposigue siderúrxicu español xunto col País Vascu, probe en carbón pero ricu tamién en fierru col perimportante yacimientu de Somorrostro. Asína medraron fábriques siderúrxiques nos conceyos de costeros al rodiu'l cabu Peñes, nos valles mineros del Nalón y del Caudal asína comu'l del ríu Trubia. La Sociedad Compañía Minera de Gozón, Sociedad Mineromatalúrgica Duro-Felguera, la Fabrica de Mieres, la Compañía Chavitou, foron dalgunes de les que se dedicarón a eses llabores estractives. La escasez de mineral durante les dos guerres mundiales asína como pola demanda nos primeros años de posguerra española ya europea marcaron el puntu álxidu d'estes esplotaciones, algamando la mina de Llumeres, la de mayor importancia n'Asturies, una produción de 86.000 tonelaes en 1950, lo que significaba un puquiñín menos de la metá de la produción asturiana n'aquellos años. Col avanzar de la recostrución europea y gracies enforma al fin de los años de l'autarquía que propició l'entamu la guerra fría, les siderúrxiques asturianes entamaron a recibir el mineral dende sudamérica o l'africa, onde la bayura de les vetes, la esplotación a cielu abiertu y lo baxo los costes de manu d'obra dieron-i el tiru gracia a les mines astures, pesllando Llumeres en 1967.

Dársena y cargaderu de mineral

     Una de les curiosidaes d'esti yacimientu ye que, al tar asitiáu nos cantiles a la vera la mar, nun llugar ensín gran polación, alcordose a entamos del sieglu XX construyir un puertu que permitiera'l tresportu del mineral dende la mesma bocamina dica los puertos de Xixón, Avilés o San Esteban, los cuales cuntaban con ferrocarril col que tresportar el mineral a les factoríes que la Duro Felgura, propietaria cabera de la esplotación, tinía na cuenca'l Nalón. Esti puertu, güei ocupáu namás que por dalguna que otra lanchina de pesca, cuntaba con unos cargaderos polos que'l mineral embarcábase nos costerinos que la Duro tinía al efeutu. El llaváu del mineral, los desagües que dende dientro la mina vertían a la mar, el mineral que dende los cargaderos finaba no fondo'l puertu, foron tiñendo de roxu l'agua, que a so vez foi dandoí el mesmu collor a les peñes de cantiles o la mesma arena la playa. Un sablón roxu que güei, 45 años dempués de finaos los trabayos mineros, sigue siendo'l sellu d'identidá de la ensená de Llumeres, como los cristales lo foron de la playa San Pedru.

Ente l'arena roxa remanecen restos d'estructures ya desaniciaes
     Dellos son los edificios, ya ruinosos, que entá son a atopase: la bocamina al pie de playa, almacenes y oficines, la casa máquines, el puertu, etc. Toos ellos son una bona muestra del pasáu industrial d'esta tierra y bien merecían unos trabayos de restauración enantes de que se vaigan abaxo pol abandonu. Mesmamente el puertu, col testeru dixebráu po la fuercia la mar, con dellos muros derruídos, colos sos cimientos minaos pola resaca, ye bon exemplu de la ruina que díi tres díi cae sobre'l llugar.

Muries que caen, minaes pola mar, argayaes polos cantiles

     Pero Llumeres ye más que una güelga de la hestoria industrial asturiana. Ye tamién un llugar nel que perdese. Un llugar al que dir nos díis de inverniza, cuando la señardá o l'atristayamientu pídenos vagar en soledá, caleyando'l rompefoles, mirando la mar batiendo escontra les peñes que anuncien la costa, somorguiandonos nel runrun de les foles que espalmen na playa o los pedreros. Rodiaos de cantiles y cola mar de fondu, comu ella ye, infinita y enigmática, con esi poder que tien, comu tien el fuéu, de suminos na sele indolencia del tiempu paráu, hipnotizándonos, serenando l'alma, afogando y llevándose con so les negrures que nos encueyen. O nuna nueche braniega, baxo un cielu escampláu, coles estrelles abellugándonos, demientres los tres faces de lluz del faru Peñes barren, un tres d'otru, imperturbables, los cantiles que por llevante zarren la bahía. 

    Un llugarín que ufierta munches posibilidaes. Que ca ún escueya la suya.


martes, 17 de enero de 2012

Tielvi: un paseín pol corazón de Cabrales

     Serpea la carretera que dende Arenas, encastrá no fondu una estrechura de muries calcárees, sube hasta algamar el pueblín de Sotres. Percorre estrechos valles tallaos na roca pol ríu Cares. Montes del calizu nos que blinquen llibres les cabres, nos que los ñeveros entamen a cubrise. Enraigoñaos ente les peñes, baxo'l mirar d'esi totem astur que ye'l Urriellu, medren los árboles nun suelu probe baxo la permanente amenaza de derrumbes y argayos. Pindios cumales que zarren mayaos y collaes que alimenten al ganáu que dende tiempos inmemoriables son el sofitu de les xentes que pueblen estes montañes astures y que son l'orixe d'una de les ayalgues más prestoses y sabroses qu'estos valles vieron ñacer: el quesu cabrales.


    Dexamos atrás la pintoresca central elleútrica del banzáu de Poncebos ya la canal de Camarmeña, la entrá al funicular de Bulnes y tres munches curves atopamos el pueblín de Tielvi, pequeña aldeína de pocu más de mediu centenar d'habitantes dedicá a la produción del quesu ya'l turismu rural. Afayanos al llugar ún de los requexos más curiosos del pueblu, un cementeriu asitiáu a la vera'l camín, de muries blanques y cipreses, que dan pasu a un puente de corte romanu-medieval axuntau a un molín nel que entá pue vese'l canal d'alimentación o la presa'l agua nel cauce'l ríu Duje. Un conxuntu de indubiable valir etnográficu que quiciaes mereza una mayor inversión nel so mantenimientu. 


     Unos metros más carretera arriba, nun pequeñu enancháu del valle apaez el cogollu'l pueblu, un pueblu mantañes de cases de piedra cola Ilesia de San Cristobal en metanes d'elli, núna plaza na que nun son a faltar ellementos tan carauterísticos comu son el llavaderu o la bolera.


     Cases de piedra, queseríes y cuadres pal ganáu, hotelinos y cases rurales. Penriba, praos de pastu nos que se mueven oveyes, vaques y caballos. Por baxu, el cursu del ríu, semando peñes y orielles de mofu y verdín, trescurre escoltáu por árboles de ribera, desnudos de fueyes n'estos díis iverniegos. Aire fríu y moyáu, arrastrando con so l'arume del práu, el golor del ganáu y la pureza que baxa de los cumales.


     Dura pocu'l sol n'estos llugares. Nun cae entá la nueche pero ya queda'l valle somorguiáu na solombra la Peña Maín mientres los caberos rayos tiñen d'anaranxau les peñes cimeres del Jorcáu La Torzal. Sube a la fin de la tardi la borrina dende´l ríu, somorguiando'l llugar nun reinu d'humedá y solombres que nun son quien a menorguiar la belleza d'estos paisaxes agrestes nel iviernu cabraliegu.


martes, 10 de enero de 2012

La bandurria asturiana: una ayalga del pasáu

    Fai ya casique 11 años apúnteme a un taller de la Fundación Municipal de Cultura de Xixón sobre la bandurria asturiana. Conocíala ya de anantes por oyela sonar n’aquel discu que fexo Trasgu nun canciu nomáu “El rabel de Caleao”. Atopela más tarde na Tabierna Folk de Santa Marina de Quirós, au la tocaba Xuacu Amieva. Dempués oyila a esti mesmu músicu tocándola en dellos de los sos discos. Finalmente víila tocar a Dani, el mio futuru profesor, nun conciertu de Lliberdón. Esi instrumentu, mal nomáu munches veges rabel por músicos y musicólogos, aportó a les mios manes pa, con mayor o menor ésitu, nun volver a dexales.
     Doi apellíu, asturiana, pa dixebrala de la bandurria de tunes y rondalles, pero nos valles casinos, especialmente nos pueblos de Caliao, Covalles o La Felguerina, nun lleva apellíu porque ellí, bandurria, namas hai una.

     Foron morriendo los vieyos que lu tocaren y les xeneraciones moces nun coyeron el relevu, asina que a punto estuvo de morrer y cayer nel escaecu, esi pozu foscu y prietu nel que ca día que pasa van cayendo toa una triba de conocimientos, hestories y recuerdos, artes y cultures pan un tornar. Por fortuna, esta vegada della xente allegose al instrumentu enantes de que los últimos bandurrieros morrieren, y con delles grabaciones dexaron recoyíos unos documentos de mala calidá sonora pero gran valir cultural. Un d’estos últimos bandurrieros, David Caballín, amás, foi  músicu de gran habilidá.

Pepe Calvo, bandurrieru de Caliao

     Pa quien nun conoza, la bandurria ye instrumentu de cuerda esfrotiá, fechu d’una pieza maera, con forma de 8 y tapa de pelleyu. Les cuerdes, tres, feches de tripa,  y de diferente gordor, esfrotiense al mesmu tiempo col cayáu, un arcu fechu con pelos de caballu de tensión manual. Les cuerdes percorren cuasi tola lonxitú del instrumentu, partiendo d’una piecina de maera, el restriellu, pasando penriba’l caballu, pa dir a la cabeza na que van afincaos n’unos tornos que permiten la so afinación. La afinación ye d'una octava ente la primera, la más gorda, el bordón, y la tercera, mientres que la del mediu afinase a una cuarta o una quinta de la tercera. Dende güeyos profanos amuesase asemeyao a un vigulín arcáicu con ciertu aire medieval. La tapa d’abaxo del instrumentu, de maera, ye plana, y suel dir ricamente tallada, conviertiendo al mesmu instrumentu n’una pequeña obra de arte popular.

      Un cantar recoyíu en Caliao amuesa bien claro la teúnica de construcción de les bandurries:

Vo facer una bandurria, d'un troncu de cerezal,
El restriellu ye de texu, el caballu de nozal,
El pelleyu d'un corderu, los tornos de recimal,
Les cuerdes son de pitina, el rabil ye de peral
 Vo cortar el rau a la yegua, pa preparai el sedal
 Y cantar enes velaes, pa que me den de cenar.
   

     Ye un instrumentu pa tocase sentáu, que nun tien una gran sonoridá, y que taba fechu pensando en emplegase en llugares zarraos comu acompangamientu de la voz en cantares y romances, aunque también permite el usu comu instrumentu solista o acompangando a la toná asturiana.

     El soníu ye complicao. No ye un soníu claru comu el que otros instrumentos nos acostumen. Hai que lo escuchar, ensin prexuicios, dexándonos llevar por un soníu que nos lleva a la antigüedá, a la Asturies rural, y que bien tocáu ye d’una belleza increíble.





video
                                                    Dani, el que me enseñare a tocar, faciéndolo nel ámbitu natural de la bandurria, la cocina.

     N’Asturies tan recoyíos dellos exemplares históricos de bandurries, casique toes elles sacaes de Caliao y redolada. Munches d’elles tienen una antigüedá de sieglu y mediu. Otres atoparonles n’Arxentina, llevaes ellí por emigrantes casinos. Ellí atopóse incluso una grabación fecha en Buenos Aires na que apaecía una toná acompangada a la bandurria, grabación fecha nun discu pizarra nos años 60. Esisten también noticies del so espardimientu n’otres fasteres d’Asturies, sicasí en tiempos muncho más atrás que ya nun dexaron munchu posu na cultura musical asturiana, lo que lu convirtió en un gran desconocíu. Caltiense también na zona occidental de Cantabria, con gran vigor, magar que la bandurria de polaciones tea una morfoloxía un puquiñín distinta, siendo un instrumentu menos vistosu aunque’l repertoriu sea en gran midía compartíu. Desgraciadamente, en Cantabria viénose modificando en gran midía el instrumentu pa “afinalu” más y dai una mayor intelectualidá, colo que ta perdiéndose munchu del tastu tradicional, atopándose músicos que toquen algo asemeyao más a un chelo que a una bandurria, tanto na morfoloxía l’istrumentu comu na teúnica d’execución.

     El repertorio ye bastante variao, ya’l ser un instrumentu fechu pa la voz, permite’l so emplegu xunto cualisquier cantarin. Asina úsase pa musicar romances y coples, bailles o tonaes.

                                    Carretera de Sevilla,  caminaba un mozo arriero,
                                    buen zapato, buena media,  buena bolsa de dinero.
                                    Siete machos arreaba, ocho con el delantero,
                                    nueve se pueden contar  con el de la silla y freno.
                                    Al revolver de una esquina  siete quintos le salieron.
                                   ¿A dónde camina el majo?,  ¿Dónde camina el arriero?
                                    Camino para la Mancha, con un encargo que llevo.
                                   A la Mancha vamos todos,  como buenos compañeros,
                                   de los siete que allí vamos, ninguno lleva dinero.
                                   Por dinero no lo dejen, alante mis compañeros.,
                                   que  llevo yo más doblones, que de estrellas tiene el cielo.
                                   Los quintos que eran ladrones, se miraron, se rieron,
                                   Y en las ventas de Alagón,  piden vino, pan y obleo,
                                   y  el primer vaso que sacan, se lo dan al mozo arriero.
                                   La tabernera que vio, que al vino echan veneno,
                                   Con muy grande disimulo, le hizo señas al arriero.
                                   Y el arriero les responde, ese vino no lo bebo,
                                   que lo beba el rey de Francia, que yo no quiero veneno.
                                   De los siete que allí estaban, siete puñales lucieron,
                                   sacó el mozo arriero el suyo, que brillaba más que acero.
                                   De los siete mató a cinco, y los otros dos huyeron,
                                   a dar parte a la justicia, que prendan al mazo arriero.
                                   Pero el mozo escribe al Rey, contándole aquel suceso.
                                   Si en vez de matar a cinco, hubieras matado un ciento,
                                   siete reales al buen mozo, mientras que dure mi reino,
                                   dos para la tabernera, por el vaso de veneno,
                                   dos para la tabernera, por el vaso de veneno.

video
Xuacu Amieva, otru de los pioneros y grandes bandurrieros


     Once años pasaren ya. Aquel entós nun yeren más de media docena los que sabíen tocar una bandurria. Güei puén atopase dos o tres docenes, más o menos avanzaos, algunos de mui buen tocar. La sangre nuea que necesitaba la bandurria pa nun desaparecer.

Tres bandurries asturianes sonando en Pejanda (Cantabria)