Guetar n'esti blogue

sábado, 28 de septiembre de 2013

La Ferrería, la cuna de doña Ximena



     A los pies de Peñamayor, no fondo’l valle de Fuensanta, llevántase un palaciu deshabitáu. Foi casa de los Alvarez de les Asturies, la familia de la nobleza astur que más poder algamó na dómina baxomedieval. Cunten les lleendes que equí ñació doña Ximena, muyer que foi del Cid Campeador, fía del conde Diego Rodríguez d’Asturies. Esa lleenda, otres hestories, durmen el escaezu de los sieglos ente eses muries deshabitaes que reposan na so soledá ente mates de castaños, carbayos y humeros, col silenciu nel aire, el marmurar del regueru o’l tintiniar de les esquiles les vaques que pacen nos praos. 

El palaciu de la Ferrería, en Fuensanta (Nava)
 
     El camín que lleva al palaciu parte de lo que güei ye la fábrica embotellaora d’agua de Fuensanta, y que antañu fuere un afamáu balneariu. Sigue paralelu al regueru Fuensanta, cuasi en llanu, nun paséu que discurre a la solombra d’una bayurosa vexetación. Arboláu de ribera y el típicu de media montaña. Ablanos, castaños, fayes y carbayos. Humeros, fresnos, xardones. Feleches y sebes. Praos, que recuerden que entá la ganadería tien gran importancia na economía rural de la zona. Un paseín en soledá (nun se albidren más cases pol llugar) curtiu que nun llega a los tres kilómetros. 

Camín del palaciu

      Queda atrás una sólida ponte de piedra sobro’l regueru. Delantre de nos una portiella. Esmanguiá, furruñosa, con cadena y candáu. Nun ye difícil sobrepasala pol llau. Zarra’l pasu a un camín ampliu, llixeramente ascendente, entá flanquiáu pola arboleda nel que, al final, per ente’l ramascu, acolombrase la pétrea silueta d’ún turruxón. Nucleu ya orixe del palaciu autual, el turruxón de los Alvarez de les Asturies, del sieglu XIV, col so distintivu aire medieval, ye’l ellementu más carauteríticu del palaciu navetu de la Ferrería.

El palaciu preséntase al visitante
 
     Tien estilu góticu el turruxón, llevantáu nel sieglu XIV comu ellementu de calter militar. Muries de metru y mediu de grosor, fines saeteres allargaes y cuatro altures enllazaes por una escalera de caracol. El pisu caberu presenta abertures más amplies, resultáu d’una primera ampliación, ya nel sieglu XVI.

El turruxón primixeniu
 
     Posteriormente, a lo llargo’l sieglu XVII, foron adosándose el restu de les construciones que güei conformen el conxuntu palaciegu: un cuerpu principal ya una capiella.

En primer términu la capiella seguía de la fachada principal

      Na fachada principal, de estilu renacentista,  ábrese una puerte d’arcu de mediu puntu fechu con sillares de gran tamañu, ensin decoración nenguna. A un llau, dos saeteres de derrame esternu, con intención meramente ornamental, non defensiva. Nel pisu superior, au s’alcuentra la parte noble, un balconín de fierru forxáu sobro repisa con moldures, y enriba d’elli, un gran escudu coles armes de los Alvarez de les Asturies.  Tamién se abren otres ventanes, dos d’elles enmarcaes por sillares bien llabraos y otres dos de menor categoría. A la izquierda, la capiella, cola puerte d’acesu de mediu puntu ente moldures, y con dos pináculos que-i dan mayor lustre, ya una pequeña espadaña. La decoración de tou’l conxuntu, sobria.

Pinga lórbayu teyes abaxu mientres el escudu amuesa l'arguyu de los Alvarez de les Asturies
 
     Nel llateral oriental, el que se abre a un pequeñu xardín, estremense dos módulos diferentes. Ún, siguiendo’l patrón de la fachada principal, sobriu, con pequeñes ventanes adintelaes dispuestes asimétricamente. El otru, col primer ya’l tercer pisu abiertos. El primeru por una arcada de tres arcos de piedra de mediu puntu, ya’l terceru, más al xeitu de lo que ye habitual nes construciones rurales astures, con una galería con correor de maera baxo cubierta.

Fachada oriental, correor ya arcada con vistes al xardín

      Afortunadamente, magar que el palaciu tea deshabitáu, el estáu de conservación ye bastante bonu, algo que ca díi ye más inusual ente esti tipu d’edificaciones. Quiciaes dalgnos ellementos anexos, comu una piscina abandonada nes cercaníes, de factura nidiamente moderna, dan a entender que quiciaes tevo vida comu residencia braniega fasta bien pocu tiempu.

Puerte d'entrá a la capiella'l palaciu
 
     Ye un placer percorrer cola vista eses muries, imaxinar lo que foi la vida ente eses muries, n’aquel llugar paradisiacu onde xurde una fonte que llamaron santa. Un placer poder esfrutar d’una xoya arquitectónica de les munches que entá guarden montes y valles d’esta tierra nuestra y, que por una vegáa, nun tengamos que llorar pola ruina ya’l desaniciu que, comu una plaga, s’esparde pol patrimoniu asturianu.

La ponte de piedra nel acesu al palaciu

El ríu fuensanta al pasu pol palaciu

Frondoses biesques flanqueen el camín

Solombres eternes ya humedá, un paraísu pal mofu ya'l felechu

Grandes castñañales cargaos d'oricios a la vera'l caleyu

lunes, 2 de septiembre de 2013

El cordal sacru del Monte Areo



     En tiempos de muncha antigüedá, al cayer la nuechi un díi d’iviernu, apaecióse na antoxana de probe casa del Fondu de Guimarán, una mendiga que imploraba pol mor de Dios que-i dieren daqué de cenar ya abellugu pa la nuechi pasar. L’ama la casa retruco-i a la farrapona pedigüeña que ná-i podíen dar, pues taba casique tan probe comu ella. Entós, la mendiga, mirando hacia’l cumal de la llomba de San Pablu, no alto’l monte Areo, ensimismá ya enixmática, repitió-i tres vegaes:

     “Monte Areo, monte Areola, tierra rica, xente boba”

     Intrigá, la muyer de la casa entrugó-i el significáu del estraordinariu refrán, a lo que la pedigüeña i respondió: Ellí, no alto, escavando un pocu, apaecerá una ayalga que fairá ricu a quien la alcuentre. Y, dicho estu, desapaeció la vieya, perdiéndose hacia el monte Areo.

     La muyer dixoilo al so maríu ya esa mesma nuechi foi cavar al llugar indicáu, atopando al cáu d’entamar el llabor, una pita con doce pitinos d’oru xunto a otres fabuloses ayalgues de incalculable valor.
 
Imponente, el Cierru los Llanos

     Esta llienda d’ayalgues tapecíes, vieyes bruxes y llugares sacros ta perespardía por toa Asturies. Fai referencia los moros míticos, aquella xente antigüo que, fuxendo de los cristianos, dexaron tol territoriu tremáu de fabuloses ayalgues tapecíes en montes, cueves y castiellos. Lliendes que durante sieglos allimentaron les ansies de meyorar de munchos campesinos probes que nun duldaben de dir a túmulos, castros y castiellos armaos con pales y fesories y ponese a cavar, a la gueta les ayalgues.

Túmulu XVII, arrasáu en bona parte por una trinchera de señalización de llindes
     El monte Areo, con un nome que supuestamente fai referencia a la vía romana que percorría el cordal pola planicie cimera y destín el Ara Sextiana de la Campa Torres, acueye nel so sen una de les principales necrópolis tumulares d’Asturies, tantu pol númberu d’estructures conservaes, unes 30, comu por el númberu de túmulos arqueolóxicamente escavaos ya estudiaos.


Túmulu V

     Va tiempu, espublicé n’esti mesmu blogue un artículu sobro la necrópolis tumular del monte Deva. N’ella facíase referencia a que’l espaciu que güei ocupa la polación de Xixón ta circunscritu por una serie de cordales de pequeñu tamañu nos que ta perclara la presencia de asentamientos neolíticos. Si la fastera leste ocúpala el monte Deva y los cordales de Pión, la ocidental, la que delimita’l conceyu col vecín de Carreñu, ye’l monte Areo.

     Cordalín de pocu altor, menos de 300 metros, y cásique 7 kilómetros de llonxitú con orientación SO-NE, presenta la típica carauterística de los asentamientos d’estructures tumulares, al ser puntu dominante de toa la cuenca xixonesa y del territoriu que pol oeste espárdese hasta’l Cabu Peñes. La parte cimera presenta un aplanamientu a lo llargu del cual atópense les estructures tumulares formando grupinos de tres o cuatru unidaes. Toa esti área angüañu ta cubiertu por parceles d’esplotación principalmente forestal, en forma plantaciones d’ocalitos, asina comu por dalgunes otres parceles pa pastos ya ivernaderos. Tamién ta bien tarazáu de pistes abiertes nun hai munchos años con motivu d’ún procesu de concentración parcelaria. Ocalitales, pistes y llabraos: si güei entá tenemos tres decenes de túmulos ye pa danos por contentos. De ente toos estos conxuntos destaquen dos, el de les Güelgues de San Pablu y la del Cierru los Llanos, al ser los llugares escavaos nos años 90 pol equipu d’arqueólogos dirixíos por Miguel Angel de Blas Cortina, y que güei alcuéntrense señalizaos y con llibre acesu al visitante.

Túmulu VI na zona les Güelgues de San Pablu

     Nes Güelgues de San Pablu, el primer conxuntu n’atopase subiendo dende Guimarán. Aunque destaca enforma el nomáu comu Dolmen de San Pablu o, arqueolóxicamente, túmulu MA-VI, el conxuntu ta formau por tres tumbes (MA-IV, MA-V ya MA-VI). Escaváronse namás que dos d’ellos, los de mayor tamañu, el V ya’l VI. Tienen unos 20 metros de diámetru y unos dos metros d’altor. El primeru, presentaba una cámara dolménica nel so interior, cenciella, polo que’l acesu a la mesma faciase por desplazamientu de la llábana cobertoria. De magar de les escavaciones el cofre dolménicu dexose al descubiertu igüandose un camín d’acesu al mesmu al traviés de la masa tumular. El otru túmulu escaváu equí, el VI, tien comu principales carauterístiques la carencia de cámara interna, tratándose d’ún túmulu simple, por acumulación d’arena silícea, ensín coraces petrees. Na parte central alcontráronse restos foguera asina comu un furacu que pudiere tratase del afincamientu d’un poste. Creése que pue tratase d’ún de los enterramientos más antiguos, datándose en finales del mileniu V o entamos del IV antes de Cristo. El túmulu IV, alcuétrase un pucuñín más alloñau de los otros, na llende colos ocalitales, y presenta un tamañu más modestu, tanto no que ye’l diametru comu sobre too no tocante al altor.

El dolmen de les Güelgues de San Pablu, nel túmulu V
     El cierru los Llanos, la estación asitiá no más cimero del cordal, ye ensin dulda la más llamativa de les dos. El númberu d’estructures fácilmente visibles ye de alrodiu media docena, ente les que destaquen el dolmen de los Llanos asina comu otru dolmen más arrasáu polos ayalgueros.

     Na más entrar nel área del cierru los Llanos vese el primer túmulu, el que denomínase MA-XVII. Lo que más llama l’atención d’esti exemplar ye que foi cruciáu por una trinchera pa dixebrar distintes parceles, y que arrasó bona parte d’elli, especialmente de la zona central. Cerquina, vese la figura dominante del MA-XV, el dolmen del Cierru los Llanos, un dólmen de corredor que algama más de dos metros d’altor nel interior de la cámara. Estaría datáu al rodiu el mileniu III a. de C. Na construción d’esti túmulu aprovechose de la orografía del llugar, escoyendo un resalte del tarrén pa llevantar el monumentu. El corredor que tien asociase a un enterramientu reutilizáu, que pudiere abrise llevantando una pequeña parte del túmulu de tierra asina como una llábana pequeña que fadría de cierru, en vede facelo pola cobertoria comu nel casu del de les Güelgues de San Pedru. El fechu de que equí la cobertoria tea un pesu de casique 3 tonelaes descartalo a les clares. Una vez estudiáu, calcúlase que’l volume del túmulu orixinal sedría d’unos 340 m3, con una estructura típica na que se sucedieren delles capes alternes de tierra y piedres. A escasos metros, al NNE del túmulu MA-XV, pué apreciase una tumba más pequeña, la que lleva’l númberu XIX, de escasu diámetru y escasu altor que fai que pase desapercibíu del conxuntu.

El dolmen del cierru los Llanos, cola cámara dolménica ya'l correor

     Siguiendo el recorríu pola necrópolis, alcuéntrase el túmulu MA-XVI, tamién escaváu pol equipu de De Blas Cortina, y que presenta una estructura dolménica parcialmente destruyía pola aición de saqueadores o ayalgueros. Trátase d’ún dolmen cenciellu de planta rectangular, nel cual el acesu fadríase por un llateral, pues la llábana cobertoria pesa en tornu a les cincu tonelaes. Pola mencioná aición de saqueadores, dalgunos ortostatos foron desplazaos del llugar orixinal, magar que otros entá conserven el sitiu. Una de les coses que llama muncho l’atención ye la desproporción ente la llábana cobertoria y los ortostatos, daqué que lu diferencia muncho respeutu al so vecín. La datación taría nos milenios IV al III a. de C. A diferencia de los otros dólmenes, que foron parcialmente restauraos durante la escavación, esti dexose tal y comu se atopare ya que los despefeutos dexaben demasiaes duldes sobro l’aspeutu orixinal.

En primer términu los ortostatos que conformaben la cámara ya'l fondu la cobertoria
       Aunque nun lo citara casu por casu, en tolos túmulos escavaos, atopáronse dientro pieces arqueolóxiques correspondientes a los axuares funerarios que acompangaben a los muertos: haches de piedra pulimentá, puntes de flecha y llámines de silex ente otros.

     Pesie a que entá se estuadiaron dellos túmulos más separtaos d’estes dos árees, comu foron el XII ya’l XXII, esos güei alcuéntrense alloñaos de les pistes y arecen de indicación que permitan una fácil localización ente tanta parcela d’ocalitos y bardiales d’escayos.

     Sicasí, el ellementu caberu que fainos referencia a esti pasáu de cultu megalíticu del cordal del Areo ye la presencia d’una cantera de la que se supone se estrayeren les llábanes y lloses emplegaes na construción de los monumentos dolménicos. La cantera alcuéntrase na Peña'l Carru, llugar dende’l cual domínase tou El Valle, y nel que son bien visibles unos crestones cuarcíticos nos que entá puen atopase llábanes sueltes similares a les emplegaes en ortostatos y cobertories, y que quiciaes tuvieren pensaes pa ser emplegaes en nueves construciones megalítiques pero que, a la fin, nunca nun se llegaron a usar.

La cantera la Peña'l Carru
     Percorrer esti cordal del monte Areo ye saber que ún ta caminando per ente siete milenios de Hestoria, dende que los nuesos antepasaos entamaren a llevantar los primeros grandes túmulo. Vieyos guardianes impertérritos d’un pueblu que vieren tresformase’l llugar ya’l home con elli: colmatóse la ría d’Aboñu, surdieron polaciones costeres, castros no alto, villes en valles y llanos. Calzaes romanes tarazaron el verde col gris de la piedra. Llevantáronse faros y templos, castiellos ya ilesies. Xurdió Xixón, la industria. Lo que güei somos, 7000 años dempués.

Localización de los conxuntos tumulares más notorios del Monte Areo