Alborada de fueu

Les seis y media la mañana. Cuéstame caltener los gueyos abiertos y fixar l’atención ne mi llabor. El trabayu va acumulándose y eso que entá nun paré. Acostase a medianuechi y llevantase a les tres y media. Asina un dí tres d’otru. Llévome la taza col café a los llabios. Ya nun soporto ni el tastu nin el golor, pero la cafeína que me percuerre por dientro ye la que me mantién en movimientu, la que-i torga al párpagu zarrase ya la mente dexase cayer nun pozu somnolencia. Miro de nueves el reló. Quédame entá llabor hasta’l meudía. Hai que chai filosofía al asuntu.

Echo un güeyu al traviés del cristal. Dexó de llover. Pero’l vientu entá nun amainó. La mar tien un tonu verdosu perguapu, mestu del azul del agua ya’l naranxáu del sable. La resaca tien to’l fondu revueltu. Les gaviotes, esnalando unes, otres posaes na mar, llancen los sos chirríos que llamen a mar.

Torno la cabeza pal otru lláu, pal de tierra, au tá’l puertu ya’l pueblu rodiaos por una cordalera rocosa, de monte baxu, casique ensin árboles. Nun ye de gran altor pero al tar tan averao a la mar destaca enforma escontra’l horizonte.

El cielu ta prietu, tremao de cúmulos, ensin lluz denguna, albidrando pol xurdir del sol que ya ta’l cayer. Un nueu día, un día más, igual que los anteriores. O non.

El cielu aclaria por llevante, xusto detrás de lo más cimero del cordal. La lluz del sol n’esa alborá de primavera entama a filtrase ente les ñubes. Seliquino al entamu, el brillu aumenta en intensidá  a un ritmu inusitáu, pero la cerrazón de le ñubes  recluye l’albor a un puntu namás, xusto enriba´l pueblu. La lluz dexa de ser lluz pa tornase en rellumu, rellumu que ciega los güeyos, que refléxase nel espeyu de ñubes, que pinta los montes de collores escesivos, roxos, moraos. Atras quedo’l verde mate de los matos o los ocalitos. Les peñes, el gris del calizu, difuminase somorguiao ente’l resplandor. 

Cansáu quiciaes d’esperar pol branu, afogáu dempués de tantos díes de ñubes y orbayu, azotáu pol nun parar de vientos fríos de salitre, el Sol decide imponer el so criteriu, prendiéndoi fueu al cielu. Marcando territoriu. Ablucando a homes y animales col so esplendor, col so poder. La cafeína nun me fai efeutu. El párpagu nun quier zarrase, y la mente, sobrecoyía, abeyase en guardar eses imáxenes nel requexu los recuerdos. Les gaviotes callen y miren colos sos güeyos prietos que rellumen de gozu. Esti ya nun ye un albor normal d’un día más, ye una alborá de fueu. 

Nel silenciu que nos acuca namás que’l vientu, puxando con enfotu les foles escontra playes y cantiles, dexa oyer la so voz, un mermuru roncu y oscilante, pa nun dexanos escaecer que, pesie a tóo, el branu entá nun llegó.

 

 

Caleyando por Pravia

     Domingu pela mañana. Dempués d’un iviernu secu la primavea paez que vien col envís de correxir el desfase hidrolóxicu. Orbaya, sele pero dafechu. Dacuandu una ñube descarga con fuercia. El cielu, cubiertu de prietos cúmulos, alluma’l paisaxe asturianu cola so triste lluz, esa lluz tenue que-i da la so prestancia a esta tierra de nueso. Esa lluz que arreblaga’l corazón, que se siente, que s’esnala. Lluz que funde na distancia la tierra ya’l cielu nun mesmu ser.

     Adormecíu pol so traquetéu ya’l calor de la calefación, báxome na estación del tren de Feve que me trae dende Xixón. Baxo sólu. Na estación nun se ve un alma. Ye domingu, y nes cais del pueblu la vida descansa. Préstenme estes estaciones, de les que tantes hai entá nos pueblos asturianos. Construyíes nos entamos del sieglu XX entá caltienen un tafu a fumu y vapor. Ensín grandes alardes arquitectónicos tienen meyor presencia y más personalidá que les nueves costruciones, munchu más funcionales, pero menos atractives. O eso al menos ye lo que a mi me paez.

Viviendes obreres

     Pravia, l’antigua capital del reinu astur baxo’l gobiernu de Silu, ye anguañu un pueblu de vida seliquina, arreblagáu nes orielles del ríu Nalón. Tien aire burgués, y aunque de fondu pasáu nobiliariu remembra más una villa de reposu de la burguesía uvieína de los años 20 o 30 del sieglu pasáu.

     Nun queden restos de les muralles de la pola medieval más alló del trazáu urbanu que n’algunos llugares entá delimita el espaciu intramuries del esternu, y el edificiu más antigüu nel cascu urbanu ye la Capiella de la Casa del Busto, de metanes el sieglu XVI.

     Cunten les cróniques de Claudio Ptolomeo, que na oriella izquierda del ríu Nalón, en territoriu paésicu, asitiabase la ciudá de Flavionavia, asentamientu romanu perimportante na Asturies imperial, y que, col pasar de los años daría llugar a la pola de Pravia. De toes formes l’asitamientu esactu de Flavionavia nun tá claru. La ubicación más probable nun sedría la mesma Pravia, sinon Santianes, llugarín averáu y cuna del arte prerrománicu asturianu cola Ilesia de San Xuan, construyía en tiempos del rei Silu (774-783). La capitalidá del reinu caltúvose durante los reinaos del mesmu Silu, Mauregatu ya Bermudu, hasta que, Alfonsu II el Castu treslladó la capital a la colina d’Ovetum, ya asina hasta güei.

Estatua del Rei Silu

     Pravia, comu cabezalera d’un conceyu eminentemente agrícola, foi perdiendo col tiempu la so puxanza al tiempu qu’el so territoriu diba desmembrándose en otros conceyos (Muros, Cuideiru y Sotu’l barcu), polo que a la fin terminó como una pequeña polación agrícola, con bona representación de casones solariegues de la vieya nobleza astur, y tierra d’emigración pa les amériques.

     Tornando a la villa, dexando atrás la estación y dalgunos vieyos edificios d’orixe fabril, subo pola cai Agustín Bravo. Esta cai marca nidiamente lo que yera’l trazáu de les muries medievales, rodiando’l cascu vieyu, y na que casones señoriales de los sieglos XVII y XVIII señalen les llendes de la pola vieya. Ente estes destaca pol so tamañu la Casa d’Alvaro del Busto, bloque pétreu de tres altures reconvertíu n’hotel. Ye un claru exemplu de la arquitectura palaciega de mediaos del XVI. Recies muries de piedra encuadraes por sillares, puerta d’acesu con arcu de mediu puntu que-i da un airiquín arcaicu, ventanales con balconaes de fierru forxáu. Sobriedá no que cinca al ornatu pero d’arrecha señorialidá. Con capiella anexa, comu yera vezu entós, trátase del edificu más antigüu de la villa. 

Casona del Busto, anguañu convertía n'Hotel

     Al finar la cai apaezo nuna plazoletina na que destaca enforma la casa de la marquesa de Casa Valdés, apellíu de gran raigañu ente la nobleza astur. La construcción actual data de 1798, construyéndose sobre una casona anterior. Presenta similares carauterístiques que l’anterior. Planta cuadrá, construyía en tornu a un patiu porticáu, balcones voladizos en fierru forxáu, sillares zarrando los llienzos, tres altures… Adxunto a la vivienda alcuéntrase la capiella.

La casa la Marquesa de Casa Valdés

     Na mesma plaza pueo ver otros edificios curiosos, casones de piedra de menor tamañu con blasones, o la mesma casa’l conceyu, edificación neoclásica del sieglu XVIII que caltién les mesmes pautes de sobritú ya arrechura que les demás, y que tién la curiosidá d’haber sío construyía col dineru sacáu del comerciu del salmón, anecdota que me tresporta a un tiempu pre-industrial, nel que’l ríu Nalón, bañaba les vegues coles sos agües clares tremaes de salmones.

     Déxome dir p’ente les cais, estreches, col pisu de llábanes moyaes embede’l asperu y suciu asfaltu que suel tar al casu, y vai dexando de lláu un contínu de casones de piedra, la mayoría bien conservaes, dalguna en plenu procesu d’abandonu, hasta llegar al corazón de la villa, la plaza Sabino Moutas. N’ella doime col conxuntu más particular de Pravia, constituyíu pol Palaciu de Moutas, la Colexata de Santa María la Mayor y les coquetes cases de los Canónigos. En mediu d’esti conxuntu la estatua del omnipresente rei Silu.

Colexata de Santa María la Mayor

     La Colexata llámame l’atención pola solidez que remana, con sólides muries de piedra casique sin entraés de lluz, ya un campanariu que remembra una torre defensiva. Construyía a entamos del sieglu XVIII, en 1715, polos arquitectos De la Riba y Pedro Muñiz, tien tres naves y cruceru, entrá porticada. Carez d’ornates esternos que-i suavicen presencia tan recia. Dientro consérvense dellos retablos barrocos asina como un muérganu del mesmu estilu, asina comu delles muestres d’arte relixosu.

     Adxuntu a la colexata atópase’l Palaciu de Moutas. De planta rectangular, construyíu arodies d’un patíu interior y dos altures, destaca enforma del restu de les construciones señoriales pravianes pola decoración que presenta la puerta, con arcu de mediu puntu flanqueada por columnes de fuste llisu y con vanos adornaos con motivos xeométricos, vexetales ya humanos. Tamién llama l’atención la gran balconada na fachá principal, con un balcón correor de fierru forxáu. No cimero, guardáu por dos lliones rampantes, el escudu de los blasones de los Cuervo-Arango, Inclán y Miranda.

Frontal del Palaciu de Moutas

     En frenti d’estos veo les Cases de los Canónigos. Les antigües viviendes de los relixosos de la colexata ye un conxuntu de tres plantes col baxu porticáu, balcones correores de fierru forxáu, y balcones zarraos con cristaleres. Carez de la magnificencia de les casones señoriales pero tien una prestancia coqueta, albidrando quiciaes el vinir de nueos aires burgueses. La bayura de grandes ventanales contrasta enforma colo opresivu de la fachá  del templu dando-i al conxuntu de la plaza un puntu menos duru.

     A un llau de la plaza, xunto una casa de corte indianu, la estatua del Rei Silu, guardián del pasáu real dela pola, con una réplica a los pies de la llosa llaberíntica que se alcuentra na ilesia de Santianes de Pravia, na que, partiendo de la casiella central pué lleése la frase “Silo princeps fecit” nun millar de combinaciones distintes. O eso al menos ye lo que dicin.

Silo princeps fecit

     Dexo la plaza la colexata atrás, y llego deseguío a la plaza’l Conde Guadalhorce, de la que sal la cai San Antonio. N’esti tarrén asitiaríase l’hospital de pelegrinos de San Antonio, que daba abellugu a los pelegrinos que diben dica Santiago pol camín de la costa. N’esta parte de la villa praviana destaquen abondes edificaciones d’entamos del sieglu XX, d’estilu modernista, bien cuidaes ya armonizaes. Estos edificios, de dos o tres altures, dan bona muestra del punxu burgues nel primer terciu del sieglu XX, nel que en Pravia se llevantaren empreses azucareres ente otres. Sin embargu, pesie al desfile de ornatos vexetales, columnes, capiteles y balconaes los gueyos vanse direutamente al cartelu que anuncia un bar, bar La Praviana. Poques vegaes vi un cartelu tan guapu, y como más val una imaxe que mil pallabres ehí va la mía

     La mañana va pasando tranquilamente. El cielu sigue enfurruñau y nun dexa d’orbayar. Continúo col dembular poles cais, pero la villa ye pequeña y nun dá pa munchu más. Dalguna capiella, comu la del valle, col so retablu renacentista del sieglu XVI. Dalguna fonte y pocu más.

     Col pelu moyáu, calaos los pantalones, tiro pa la estación. Pol camín paro nun comerciu a mercar unos carajitos, pa dir faciendo el camín de torna a casa más dolce. Entá me queda media tarde, pero el vagar poles tranquiles cais de la villa praviana baxo’l orbayu déxenme un sentir serenu, pacíficu. Un tastu a esi mundiu nel que la vida trescurre más seliquino.