Guetar n'esti blogue

martes, 6 de noviembre de 2012

Caleyando poles Peñes del Fontañán



     Dexando atrás esta Asturies Trasmontana nuestra, baxando’l puertu Payares, al suroeste del pueblu de Nocedo de Gordón, llevántense arreches les Peñes del Fontañán, una cordalera de calizu con orientación E-W que llega algamar los 1629 m d’altitú. Una de les estribaciones de la Cordillera, un de les primeres altures que atopamos cuandu, dende Llión, averamonos a tierres astures pola ancestral puerte del Payares.

     Montes cismontanos, nos que abonda’l matu y faise estraña la biesca. Montes duros, ásperos, de cascayu, escoba y piornal. De ñeves, xelaes y airones secos. Un monte distintu a los que pocos kilómetros más al norte, con vexetación bayurosa, montes viciosos, comu  verdes engurries crucien la superficie d’esta tierra. Tarazaos polos ellementos: la ñeve, el xelu ya’l calor que francen la peña, canteres y mines que afonden les entrañes pa sacayos piedra y carbón. Montes distintos, pero cola so propia personalidá. Montes con munchu que ver, con muncha hestoria tarazá a fueu y sudor.

     Sube la pista, pindia, abegosa, coles rodaures afondaes poles lluvies pasaes, cortá na tierra y na roca, dexando nel aire un aire roxu del polvu resecu, arcillosu, y que llevanta’l aire que, secu, fríu, baxa dende los más altos cumales de la Cordillera. Y llegamos al colláu Urdiales, un mayáu a 1500 metros d’altor ente’l picu Rebolleras y el Miezca. Dende equí, a manzorga yérguese el primer monte al que voi subir, el Miezca.

Cumal del Miezca. Al fondu, el Fontañán.

      Montes d’usu ganaderu escasu, nun tienen caleyes que te conduzan a la cima. Xubiendo la pendiente pendirriba, guetando ente yerbes y matos les guelgues dexaes pol ganáu pa facer más llevadera l’ascensión, aportase a la cima, d’orografía más suavina, con presencia de xardones pola fastera norte y pedreros na sur. Entá fai bon tiempu. La vista ye nidia pa un llau y l’otru. A lo fondo, mirando al Sur, albidrase la mesma capital llionesa. Al Norte, les muries d'Asturies.

Panorámica dende'l Miezca. A lo fondo, Asturies


     Nel monte, bien visibles pola escasa vexetación y la ocasional presencia humana, destáquense multitú de restos de lo que hai 75 años yera la línia del frente los puertos. Trincheres, ñeros y parapetos espardios por to’l cumal, y ente les yerbes y los cascayos herrumbrosos pedazos de metralla, restos de proyectiles que un bon día frayaron el monte y, quien sabe cuantes, les vides de milicianos que defendíen el llugar. En Asturies, pesie lo violento de los combates que los fadría más abondosos, los restos rápidamente foron quedando somorguiaos baxo un mantu vexetal, una densa capa d’humus que, aidáu pol agua foi, pocu a pocu, desfaciendolos, borrándolos. Equi eso nun pasa y los restos permanecen al aire, entre les piedres, ocupando quiciaes el mesmu llugar nel que cayeren 75 años atrás.

Trincheres y parapetos nel Miezca
 
     Ente tanta roca, atopamos un vecín percuriosu. Una chicharra, un primu hermanu del grillu de munchu mayor tamañu. Paez tener un aguyón, pero nun ye más que’l ovopositor, l’apéndice que cíncase na tierra pa dexar los güevos bien enterraos. Ye un animal inofensivu y curiosu, concretamente un Pycnogaster sp, una subespecie pocu frecuente y, a menudo, endémica de áreas llimitaes.

Pycnogaster sp o Chicharra
 
     Sigue la cordalera en suave sube y baxa, nun camín que cuerre paralelu a un gran crestón rocosu de calizu asemeyando l’aleta dorsal fosilizá d’un dinosauriu. N’esta parte del camín abonden los xardones. Antes d’algamar el monte cimeru, el Fontañán, que gallardosu amuesase al fondu, pasamos pola Bardera. Equí, nel suelu probe, nos clariones que queden ente la yerba vense los ñeros de un d’esos habitantes del campu que xeneren un miéu, atávicu, nel home, un sentimientu nel que s’amesta el temor y la repulsión, la llienda ya’l desconocimientu. Falo de l’araña llobu, la tarántula primixenia. Esa araña pelona que llevó a los descubridores españoles en América a poneila a cuanta araña xigante veían. Dízse de mortal picadura, más nun ye más peligrosa que la d’una abeya o una avíspa. Dízse que pa esconxurar el poder del so velenu hebía que danciar una danza a la que-i dio nome, la tarantella, y que entá nos bailles asturianos d’anguañu pervive nun de los pasos de la xota, nos que los baillaores paecen asemeyar que pisen a la alimaña al marcar el pasu. Miedosa por ñatura, esta araña nun se suel dexar ver aunque, con un pocu de fortuna y armadinos de pacencia y una cañina, puen sacase del ñeru durante unos segundinos nos que apreciar la so difícill belleza.

Araña Llobu o Tarantula
 
     Arañes al marxe, al pasar pola Bardera entamamos a subir a un pequeñu grupu de picos conocíos como les peñes del Fontañán, de la que esta nun ye más que la cabezalera. Monte ermu, dominante del valle, pedregales espardíos perende, y dellos crestones no cimero. Ente les peñes, mirándo a llevante, albidrase la mano del home. Una muria gris, formigón, con troneres que, amenazantes, llindien el valle. Retayos d’un fortín que al xeitu medieval quería controlar un territoriu y una vía de acesu. Castiellu modernu, llevantáu por aquellos que, incapaces de avanzar, punxeron tol enfotu en non dexalos pasar. Pero pasaron. Grutes barrenaes ente’l calizu, refuxos escontra aviones y obuses, trincheres zigzagueantes comu repuelgos na tierra. Tol cumal foi un fortín y entá güei lo ye pa disfrute del amante de la nuesa hestoria, pa facenos sentir que daqué que paez tan alloñao de nos enta sigui equí, amosando les sos güelgues, pidiéndonos nun escaecer.

Fortificación del Fontañán (Númberu 2)
 
Ñeru del Fontañán (Númberu 3)

Trincheres nel Fontañán (Numberu 1)

     El cielu, pocu a pocu va cubriéndose. Ta inestable, y donde enantes víase la estación ivernal de Payares agora vense ñubes baxar, prietes, cargaes d’agua. Torno pol mesmu camín, triando los mesmos pasos que diere pocu tiempu va, dexando’l Fontañán al llombu, la Bardera y el Miezca, dende esti vese cercanu el picu Siza y el camín que, al traviés del Currichico baxa sele en direición d’Olleros d’Alba. Mas pa poniente, otres cumes que siguen la cordalera camín del puertu d’Aralla: Bustillu, Alticu y Amargones. Cumales con más de 1800 metros d’altor nos que’l friu y el calor foron frayando el calizu, tresformándolos en inmensos pedregales ermos.

Rebolleres, y al fondu Amargones y a la mandrecha el Alticu.

      Tou eso quedará pa otru día. Agora torno pola pista, pendibaxo, baxo el orbayu que entama y que pronto sedrá lluvia torrencial. Voime col corazon engurriáu, triste pola triste hestoria que dexo atras, hestoria de lluches y muerte. Y ye que munchos dexaron la vida ellí, de xuru que si. Y dalgunos siguenla dexando güei. Y alcuérdome de dos horas antes: Un ramín de flores, una placa ente unes peñes, una mocina que, nuna mala cayía, dexó la vida. Trai la fecha. Mayu. Malpenes van unos meses. Quiciaes, comu se dicía del perru que preba la sangre cande, la montaña, cuando la preba, nun la dexa enxamás.

Vista aerea del Fontañá. Vense bien les trincheres en zig-zag.

3 comentarios:

  1. Yo estuve allí. Magnífico sitio. Estuve con un amigo gijonés oriundo de Sorribos de Alba. Bonito pueblo rodeado de buenos bosques.

    ResponderEliminar
  2. Un llugar bien guapu y con munchu que ver. Hai dellos valles con biesques de rivera dignos de ver.

    ResponderEliminar