Camín de Peña Cabrera

     De pié, xunto a la teyavana de la ermita de San Mamés, cola vallina el ríu les Penes a lo fondo y, desperdigaos ente montes d’ocalitos, praos nos que les vaques pintes pastien al so aire, y pumaraes de ramaxe desnudu y bolines d’arfueyu, albídrense aldegues y llugares: Breceña, Sietes, Novales, Cuetu. Caseríes que nin apaecen nos mapes, llugares con nomes que nun conocen más que los llugareños. Detrás queda la Madrera, coles sos cases de piedra. Carretera alantre, camín de Llugás, Cermuñu.

Capiella de San Mamés de Cermuñu

      Anunciáu l’iviernu que pica a la puerte, apigaza la seronda acucá pol calorín del Sol nun día rescampláu. Les ñeves, presentes ya en dalgunos cumales, dueñes de les peñes calices del macizu los Picos d’Europa, prepárense pa nos meses venideros esparder el so dominiu sobre la montaña central, intentando, una vegada más, algamar a tocar les agües azules del Cantábricu, de facer de so aquella inmensa pradera azul. Un añu más. Aunque siempre terminen por dir a morrer na oriella. Pero pa eso entá queden por vinir los caberos díesd’Avientu, el fríu y les ñevaes de Xineru y Febreru, coles invasiones de frentes polares y galernes atlántiques. Agora, n’estosdíes previos a les fiestes d’Avientu, montes y biesques apigacen al calor del sol caberu.

La mole calcárea de los Picos d'Europa, ente ñubes y ñeves

     Presta caminar por este carreteres de montaña perdíes polos valles secundarios de los valles secundarios. Vense les caseríes, el ganáu, dalgún paisanu trabayando una tierra, el ruíu d’una motosierra de quien ta preparándose pa cuando’l fríu y la humedá faigan por fin actu de presencia. Nun hai tráficu, así que ún se pué demorar tranquilamente na percepción del llugar, el caminar baxo el eternu ruxir de les fueyes ximielgaes pol aire, pol glayar de les pegues o’l llonxanu lladrar d’un perru. El tiempu ye relativu. Espárdese y comprímese sigún la velocidá a la que se mueva un cuerpu. Daqué asemeyao, envueltu en milenta fórmules matemátiques de abegosa comprensión, valiói la reconocencia mundial a Albert Einstein, treslladándolu del mundiu los mortales al Olimpu de la ciencia. Pero esa mesma idea, ensin envoltoriu matemáticu, bien que la sabía la xente rural. Y ye que la vida en montes y valles, alloñaos del continuu vivir a la solombra’l reló de les urbes, siempre trescurrió más despaciu, seliquinamente, dexándose llevar pola rueda eterna de les estaciones y los llabores del campu. Pa cada cosa hebía’l so momentu y por más que se corriere enantes nun se llegaría.  Tou tien el so xeitu, el so ritmu. Cuantu más cuerras mas rápidu va dir el reló.

Llugarinos escaecíos en metanes d'un monte

 

     Al dexar Cermuñu atrás, a manzorga la carretera pocos metros enantes de llegar a los Llanos, xunto a les muries ruinoses cubiertes pola maleza de lo que n’otru tiempu fueren les escueles pa los neños del llugar, sube un caleyu cubiertu de follasca. Un camín que lleva al cumal de Peña Cabrera.

Camín de Peña Cabrera dende Cermuñu

     Entaína el caleyu a la solombra les rames cuasi desnudes de carbayos y ablanos. Cruxen les fueyes baxo’l pesu del home al andar apropiándose’l soníu de la quietú n’eses estribaciones del cordal de la Soma. Xuegos de solombres y lluces que se filtren ente los árboles, allumando felechos, oscureciendo requexos, dando-i tétrica belleza al tueru d’un árbol resecu que, ensin vida, entá se ufierta a los elementos sólu, desafiante, comu queriendo dicir:

-          “Equí toi yo, esperándovos. Haber si sois quien a echame abaxu”

     Munchu esfuerzu baldríu. Dalgún díi, el raigañu secu non soportará los embates del vientu, el continuu minar de la carcoma y la humedá y, sólu, el árbol vendrase abaxu ensin llegar nunca a saber si fexo ruíu al cayer.

     Abondos son los ocalitos que pueblen estos montes, montes comunales, montes privaos, que vieren nos años de la industrialización una bona fonte d’ingresos pa munches mates y praos que, col abandonu del campu comu llabor primariu, ya nun lleren necesarios. Cuarenta años dempués esos ocalitales espardieronse, comieron-i  el sitiu ya’l alimentu a los vieyos carbayos, a los castaños, a les zreizales. Afogáronlos de sede y adueñaronse de tóo. Probes dexaron los montes, col tarren tremao de fueyes que nun quieren o nun saben pudrise, colos tueros semeyando los deos d’ún lleprosu apestáu, cola pelleya descolgándose-i ensin remediu. Llepra que emprobeció los montes, aunque equí entá caltenga la ñatura caducifolia un reductu del so antigüu esplendor. 

Arrodiaos polos ocalitos la biesca cantábrica resistese a desaniciase

     Oricios de castañes, cocaes, corrompides pol agua, amayucaes. Dalguna entá de bon ver y meyor xintar. Los frutos colloradinos del xardón, rellumando al sol, demostrando que nel iviernu tamién espoxiga la vida. Fresnos, bidules, salgueres. Tueros vestíos pol sayu la yedra. Un verdor bayurosu baxo el sol del mediudíi. Esa bayura, esi collor, el d’una tierra fértil y xenerosa que, munchos años va, ablucó al soberanu más poderosu del planeta, camudando-i el nome a la pola de Maliayu pol de la Villa Viciosa.

     Tórnase pindiu el caleyu. Albidrase ya el final, el cumal de la Peña Cabrera.

     En metanesd’un llanu, antigüos tarrenos comunales de la xente los pueblos de Niao, la Roza ya’l Escobal, afítase arrecha la Peña Cabrera, un peñascu calizu que bien remembra’l asitiu un castiellu, dominando dende los sos 495 metros d’altor tou el valle Cabranes, la puebla maliayesa cola ría y los puertos d’El Puntal y Tazones. Al otru llau, además de pueblos maliayeses comu Sietes o Breceña, a lo fondo, baxo’l mantu blancu les ñeves, los picos d’Europa, maxestuosos señores d’estes tierres nortiegues.

En mediu la campera la Peña Cabrera

     Quédome sentáu a la solombra d’un solitariu texu, al pié del peñón, cola botella d’agua fresco na mano, dexándome llevar pola ausencia de soníos, el silenciu asonsañador que arreblaga l’alma, que incita a descansar, mirando a llonxano, ensin pensar en ná. Y que el tiempu pase comu tien de pasar. Despaciu ...

El texu, árbol sagráu de los pueblos astures

La mariña maliayesa, ya'l fondu, la mar