Guetar n'esti blogue

lunes, 16 de julio de 2012

El Moyón de la Corralá


Del Moyón de la Corralá
al matu’l Rateru,
hai un pelleyu de güé pintu,
tou llenu de dineru.

                En metanes el valle d’Ayer, a la vera la carretera que baxa dende San Isidro, alcuéntrase la Pola Vieya (Pola del Pino en castellán), un pueblín pequeñu, de poco más d’un centenar d’habitantes, pero que destaca enforma por ún d’ellos, quiciaves el más famosu, que dende cuantayá guarda’l pasu a la plazolina conocía pola Corralá. Esti vecín ye’l perconocíu Moyón de la Corralá.

                El Moyón de la Corralá ye ún de los elementos más curiosos que n’Asturies podemos atopar. Curiosu tantu poles lliendes d’ayalgues y moros misteriosos que circulen alrodiu d’elli comu pola indefinición del so orixe.

El Moyón a la entrá de la Corralá

                 Tradicionalmente considerase’l moyón como una piedrá llabrá polos moros que indicaría’l llugar au taba atapecía dalguna ayalga maraviosa qu’estos dexaren enterrá al fuxir del avance de les güestes cristianes. Esti calter paganu tan común nes costruciones pre-cristianes sedría la razón pola que a lo llargo’l mesmu son atopase tantes cruces grabaes, nun intentu por cristianizala y sacralizar un simbolismu y, quien sabe, si dalgún ritu o creyencia a ella asociá.

                Pa’l que nunca lu viere, el moyón ye un monolitu de piedra arenisca llantáu a un lláu del acesu a la plazolina de la Corralá, nel centru la Pola Vieya. Ye de grandes dimensiones, en torno al 1,90 metros d’altor por 0,5 metros de diámetru. Tien sección cuadrada nel cuerpu central, y en conxuntu guarda una nidia forma fálica que podría averala a antigüos ritos de fertilidá. Nes sos cuatru cares tien una bayurosa serie de grabaos, que van dende figures laciformes, antropomorfos a cruces llatines o griegues pasando por cazoletes y diversos piqueteaos. Lo ciertu ye que, pesie a que el reconocimientu arqueolóxicu féxose en 1975 pol eminente arqueólogu asturianu Miguel Angel de Blas Cortina, non foi hasta’l añu 2004 que se fixeren los primeros trabayos d’escavación que pudieren echar lluz sobre’l orixen d’esti monumentu.

                Los grabaos que se puén atopar son, siguiendo la mesma descripción que en 1975 fixere De Blas Cortina los siguientes:

                Na primera de les cares, la que primeru se ve al adientrase na plaza y que ta orientá hacia’l Norte presenta dellos trazos incisos suelto, dalguno más fechu por percusión, xunto a un grabáu de más llabor, un laciforme u alfabetiforme, con forma 8, piqueteáu y de bon tamañu (22x12 cm). Así mesmu, hai grabáu por trazu incisu cenciellu una figura laciforme de pequeñu tamañu asemeyá a símbolos de cantería ampliamente espardíos en ilesies y otres construciones. Lo más curiosu ye que nel primer estudiu fexo sobre los grabaos por Blas Cortina nun sal mencionao, lo cual pudiere llevanos a que o bien se tratare d’un grabáu postreru o bien pasare desapercibíu nel estudiu de 1975.

Laciforme nun recoyíu nel análisis primeru de los grabaos fechu por De Blas Cortina en 1975.
 
          La segunda de les cares, la que da pa’l Oeste, pa la zona pasu, tien distribuyíes a lo llargo la superficie les siguientes inscultures:

-          Una llatina de gran tamañu (23x15cm) na parte superior
-          2 llatines más, de 13 x 10 y 13,5 x 2,5 cm debaxo l’anterior
-          Otra de 12,5 x 15 cm, de factura más confusa
-          Dellos repicaos en forma vírgula y dos cazoletines d’unos 4 cm de diámetru.
-       No más baxo, dos cruces incises de 7,4 x 6 cm (de trazu cencielu) y 10 x 10cm (con un trazu más gruesu).
 

Vista xeneral de la cara W.

Detalle cruz incisa y cruz incisa con piqueteáu postreru (Cara  W)

       La cara Sur, la que da pa la Corralá, presenta tamién dellos cruciformes que, d’arriba abaxu son los siguientes:

-          Una cruz llatina, d’unos 10 x 8 cm, de trazu desigual.
-          Embaxo d’esta una cruz potenzal (colos estremos de los brazos finaos nun remate perpendicular a cada brazu) enriba d’una peana o base triangular. Esta presenta asimesmo delles zones de piqueteáu que bien pudieren ser d’otra cruz, quiciaes grabá con anterioridá. L’altor d’esti conxuntu algama los 22 cm y l’anchu másimu los 15.
-          A mandrecha d’esti conxuntu apaez una pequeña crucecina de xeitu griegu de 5 x 5 cm.
-     Más abaxu apaecen dellos piqueteaos ensin forma concreta asina comu un par de pequeñes cazoletes de 2,5 y 4 cm de diámetru.
-       Por últimu, na parte inferior del monolitu una cazoleta y otra cruz griega incisa de pequeñu tamañu na parte izquierda y otres dos cruces incises na drecha.

Vista xeneral de la cara Sur
Detalle cara S: cruz potenzada sobre pedestal
La cara cabera, la que da pa’l Leste, pa la muria de “la casa Toña”, guarda’l que ye el grabáu más curiosu del conxuntu. Aunque al tar en llau de solombra y humedá tien abondancia de líquenes, na parte cimera izquierda apaez una figura antropomórfica bien piqueteá. La figura humana tien una perspectiva asemeyá a la que apaez nel arte exipciu: el torsu vese en perspectiva frotal pero les estremidaes inferiores en vista llateral. Distinguese perbien los brazos y piernes, colos pies dando direcionalidá al grabáu, el torsu ampliu y la testa con una prolongación al xeitu d’un tocáu o sombreru. Debaxo’l antropomorfu una cazoleta bien nidia y a mandrecha dellos grabaos lliniales incisos. La figura tien unes dimensiones bien curioses, con un altor alrodiu los 29 cm, con un anchu másimu de 17 cm ente manu y manu. La cazoleta tien un diámetru en tornu a 5 cm.

Antropomorfu del Moyón y cazoleta

Aunque el so orixe entá nun ta claru, les recientes escavaciones arqueolóxiques llevaes a cabu nel monumentu arroxaren un poquiñín más de lluz, magar de que esta entruga, la del so orixe, caltenga la so incertidumbre. Inicialmente sopesáronse pa’l Moyón el orixe megalíticu (menhir neolíticu), el de fitu territorial de dómina medieval o fundacional de la polación ya incluso el orixe comu construción pal zarráu del acesu a la corralá. Los estudios de los estratos sobre los que ta fincáu dexó bien nidio dellos detalles:

-         El Moyón ta afitáu nun fosu sobre un estratu arcillosu (antañu nivel del suelu esterior de les viviendes) rodiáu d’una cama de piedres de tamañu mediu. La parte enterrá del Moyón sedría d’apenes 20 cm.
-          Nun s’atoparon materiales arqueolóxicos na escavación.

El fechu de que’l moyón tea sofitáu enriba’l nivel antigüu del suelu de la Corralá, y que les cases más antigües que la formen tengan una cronoloxía de finales de la dómina medieval indica que’l Moyón nun ocupa’l so llugar orixinal, y que foi treslladáu en tiempos rellativamente modernos (posterior al XVI o XVII) dende’l emlazamientu orixinal. Al determinase que’l megalitu ocupa un llugar ayén al orixinal torna a ganar posibilidaes el so orixe comu menhir, pues ún de los pilancos que más fuercia garraba pa obtener esti calter yera’l de tar asitiáu nun llugar que nun cumplía coles carauterístiques habituales na ubicación d’estos megalitos, asina como la ausencia de estructures tumulares que hubieren sido arrasaes pol desarrollu urbanu de la pola. La otra gran posibilidá, la de que se tratare de un fitu territorial afincáu n’otru lláu sigue ensin podese descartiar. Ye vezu común el marcar les llendes territoriales con peñes, munches vegaes marcaes con cruces. Esti vezu podría tar detrás de munches cruces grabaes nos cordales asturianos como pudiere ser el casu de los del Picu Berrubia, que separtaben les vertientes del cordal que pertenecíen al Conceyu de Tudela, dependiente del obispáu del d’Olloniegu, o’l del Picayu, na llende’l conceyu Uviéu y l’antigüu de L.lena. Ensin embargu, lo que ye menos habitual ye que pa esti fin se optase por un monolitu tan trabayáu asina comu que se grabasen tantes cruces. Esta abondancia de cruces inclina a pensar más nun orixe relixosu paganu que’l de mera demarcación territorial. De toes formes, tradicionalmente munches estructures megalítiques foron emplegaes comu mediu de demarcación de territorios. 

De tratase d’un menhir, el Moyón de la Corralá cobraría muncha más importancia dientro’l panorama hestóricu asturianu al tratase d’un tipu d’estructura escasísimu n’Asturies a diferencia d’otres fasteres cantábriques nos que son más abondantes, comu Galicia (onde, por exemplu, hai un menhir, el de Gargantans, que aseméyase abondo a esti), Euskadi o mesmamente Cantabria.  La datación, evidentemente, al carecerse de elementos contestualizaos ye imposible de concretar, pudiendo dir dende’l neolíticu o’l bronce inicial a dómines medievales.

Menhir de Gargantans (Pontevedra) afitáu n'una necrópolis tumular y de carauterístiques asemeyes al Moyón
Menhir d'Ouvienes (Valdés), otru posible menhir astur
Pa finar, lo únicu ciertu ente tantes incertidumbres ye que, por si mesmu, y seya cual seya l’orixe, la finalidá cola que se llevantó o quien lo fexo, la maxa y les lliendes que lu rodien son bagaxe más que suficiente pa dexase cayer por esti pueblín ayerán y disfrutar del Moyón de la Corralá.

Cruces incíses, piqueteaes ya amestaes. Repiqueaos en forma vírgula. Cara W.

2 comentarios:

  1. Interesante, de verdad. La verdad que Asturias tiene una historia muy rica, creo que como todo el arco atlántico.

    ¿Conoces el castro del Chao en Grandas?

    Un saludo

    ResponderEliminar
    Respuestas
    1. Si lu conozo. Echa-i un güeyu al post

      http://asturtsalia.blogspot.com.es/2012/02/ruta-castrena-pol-cursul-riu-navia.html

      Eliminar