Guetar n'esti blogue

lunes, 4 de abril de 2011

Entamando: me presento


Entamo n'esti mundiu de los blog pa dar mi visión de les coses, pa dar a conocer los mios intereses o les mio esmoliciones. Soi asturianu, y siento lo astur como un cachín de mi. Por eso escribiré, delles vegaes, n'asturianu, otres, en castellán. Según lo sienta. Y ye que aunque pa mi la mio fala ye'l asturian, tamién lo ye el castellán y si nunca nun renegué del primeru, tampocu lo fice del segundu.

Soi asturianu xixonés, tudelanu y reculañu. Dellos raigaños cincaos n'esta tierra. Emocióname l'orbayu, los cielos grises comu'l plomu, el verde intensu de los montes y los praos. Arrechome coles andancies de Gonzalo Pelaez, cola Sangre d'Ochobre, colos milicianos del 36. Sientome herederu de los homes que forxaron el clater desta tierra. Xente que siempre lluchó polo de so, xente que siempre tuvo que lluchar dende abaxu, escontra fuercies mayores, a sabiendes que nada más tiníen que facer que perder, con honor, con honra y con orgullu, pero siempre perder. Asturies, tierra de grandones, tierra de perdedores. Y yo siéntome un d'ellos. Nun reniego.

Préstame la Hestoria, la Ñatura, la música y les tradiciones. Préstame lo vieyo, lo arcano, aunque vivo no moderno. Siento que ñací na tierra na que tuviere que ñacer, pero no nel tiempu. Quiero falar de dólmenes y túmulos, grabaos en piedra y pintures rupestres, castros y castiellos, ilesies y palacios. Quiero falar de hestories, de tradiciones, de música asturiana. De montes y valles, pueblos y llugares. Quiero falar de tou aquello que me fai ser quien soi.


Sirva pues esti entamu pa dar pasu a esti nuevu mundiu que se abre ante mi. 


¡¡Adelante!!


No hay comentarios:

Publicar un comentario